Depi 7 oktòb 2023, Leta Juif la anrejistre atak ki fè plis dega nan mitan sivil ki sou teritwa yo: 11 sivil ant 10 a 20 lane mouri epi 19 lòt blese se bilan atak sila a. Lame Izrayèl la akize gwoup teworis Hezbollah ta dèyè ti wòkèt ki frape Plato Golan ki se yon mòso tè ki anekse ak peyi Izrayèl la. Yon akizasyon gwoup Hezbollah voye jete byen lwen.
"Nou pral prepare n pou bay Hezbollah nonnen pyès yo, n ap fin ak evalyasyon yo epi pou kòmanse aji" se deklarasyon pòtpawòl Lame Izrayèl la. Yon lòt kote chèf gouvèman Izrayèl la ki an vwayaj nan peyi Etazini nan objektif pou jistifye lagè nan Gaza, deklare: "Hezbollah ap peye sa chè, yon bagay ki poko janm rive yo gen pou rive yo". Premye Minis Benjamin Netanyahu pare pou rantre prese prese nan peyi l non sèlman pou pote sipò l ak fanmi sivil ki tonbe yo men tou pou bay Hezbollah yon repons rapid vit.
N ap raple nan dènye tan sa yo lame Izrayèl la angaje l nan plizyè gè: nan Gaza peyi Palestin kont Hamas yo, Nan Yemen kont houthiste ak Liban kont Hezbollah.
Comentarios