Yon Rankont Estratejik pou Ranfòse Sekirite Migratwa a.

Lendi 4 novanm 2024 la, Direktè Jeneral Imigrasyon ak Emigrasyon an, Stéphane Vincent, fè yon rankont enpòtan avèk enspektè ak sipèvizè Imigrasyon nan Ayewopò Entènasyonal Toussaint Louverture a. Objektif rankont sa a se te raple enpòtans travay chak ajan nan kontwòl mouvman migratwa yo epi pwoteje sekirite peyi a.

Pandan rankont lan, M. Vincent mete aksan sou enpòtans vijilans ak entegrite nan travay chak ajan Imigrasyon. Li te fè konnen nan yon mond ki toujou ap chanje, misyon ajan yo depase senp kontwòl; li vin esansyèl pou sekirite peyi a. “Nou dwe respekte pi wo estanda yo pou n ka pwoteje teritwa nou,” se sa M. Vincent deklare, pandan l ap ankouraje ajan yo fè tout sa yo kapab pou reponn ak responsabilite sekirite yo.

M. Vincent gen vizyon pou ogmante kapasite ekip li a pandan l ap kolabore sere ak patnè estratejik yo, ak yon objektif pou fè pwosesis Imigrasyon yo pi efikas epi transparan. Rankont sa a se yon gwo pa nan direksyon yon sèvis Imigrasyon ki toujou ap amelyore pou asire sekirite ak byennèt nasyon an.