Jou ki te samdi maten 14 desanm nan, bato Sicilia te fè nofraj toupre plaj "Cocoyer Beach", nan zòn vil Ti gwav. Bato sa, ki te soti Pòtoprens epi k t ap dirije l sou Miragwàn, te transpòte yon kantite pasaje okenn moun pa rive konnen. Jouk kounya, 20 moun senpman ki rive reskape, pandan plizyè lòt moun, ladan yo yon ofisye Gadyen Kot la, disparèt, dapre deklarasyon Erik Prévost Junior, direktè jeneral Sèvis Maritim ak Navigasyon Ayisyen (SEMANAH).
Nofraj sila rive fèt nan anviwon 3è40 nan maten, nan yon distans de 2500 mèt sou lanmè, nan twazyèm seksyon kominal Tigwav la. Erik Prévost Junior eksplike vwayaj la te òganize nan mitan lannuit san kontwòl otorite maritim yo. Sa ki fè, li vin difisil pou konnen egzakteman kantite pasaje ki te sou bato a, nan moman nofraj la.
Operasyon sekou yo ap kontinye pou kapab jwenn pasaje ki disparèt yo. Anplis ekip SEMANAH yo, minis Herwil Gaspard, anonse ekip li ap patisipe tou nan rechèch la, pandan y ap mete resous disponib pou bay pasaje ki reskape yo bon jan asistans, pandan otorite ki konsène yo ap kontinye bouske moun ki disparèt yo. Trajedi sa a raple defi ki genyen nan transpò sou lanmè ki pa kontwole, epi ranfòse bezwen pou plis kontwòl sou vwayaj sou lanmè yo.
Comments