Selebrasyon nouvèl ane, youn nan moman ki gen anpil siyifikasyon, epi k selebre lavi te tounen yon kochma pou yon fanmi nan Delmas 75, ane sa. Steve Orly Daniel, yon tibebe 10 mwa, pèdi lavi l apre li te frape anba yon bal mawon pandan selebrasyon yo. Trajedi sa a, ki make tout kominote a, soulve kesyon sou mank responsablite kolektif la.
Manman ak papa viktim nan, Steve Valery Daniel ak Lina Célise, pa ka jwenn lapè. "Nou pèdi pitit nou pou yon rezon k te ka evite" papa a deklare, pandan li eksprime kòlè li fas ak pratik danjere sa a, ki kontinye ap fèt nan ane 2025. Malerezman, ka sa a rantre nan pratik selebrasyon lavi ak lanmò, an Ayiti, sitou. Pandan antèman yon polisye nan Delmas 75, nan kèk mwa pase , yon elèv te deja viktim anba bal mawon ki te tire anlè, yon rapèl sou danje koutim sa a.
Yon vwazen ki te temwen dram nan lanse yon apèl pou sansiblizasyon. "Li enpòtan pou sansiblize popilasyon an sou danje koutim sa a. Otorite yo dwe pran mezi sevè pou evite trajedi konsa." Li ajoute festivite yo pa t a dwe janm tounen sous lapenn. Bal ki tire anlè a, menm si yo vize eksprime lajwa, retounen atè ak yon fòs ki ka touye moun. Pratik sa a kontinye, malgre kantite viktim li fè chak ane.
Lanmo Steve Orly Daniel, yon lòt fwa ankò, mete limyè sou ijans pou pran aksyon kont pratik danjere sa a. Pèp la ap tann repons otorite yo sou move pratik sa, epi envite fòs lòd yo frennen pratik sa a, ki avidèy, pa sispann mete dlo nan zye pèp la.
Comments