Wa Maori Kingi Tuheitia Pootatau Te Wherowhero VII mouri vandredi 30 dawout 2024 a 69 lane, daprè reprezantan li yo. Wa a, ki te fèk selebre 18èm anivèsè kouwònman li, te nan lopital pou yon operasyon nan kè epi li te gen plizyè pwoblèm sante nan dènye ane yo.
Li fè Tuheitia Paki an 1955 nan Huntly, Nouvel-Zeland, li te kouwonnen wa 21 dawout 2006, aprè lanmò manman li, Te Arikinui Dame Te Atairangikaahu. Wa Tuheitia, ki pa t gen okenn pouvwa jidisyè oswa legal, te jwe yon wòl seremonyèl enpòtan kòm reprezantan mouvman Kingitanga, ki te fonde an 1858 pou ranfòse rezistans Maoris kont kolonyalis.
Premye Minis Nouvel-Zeland, Christopher Luxon, fè lwanj angajman Tuheitia pou pèp li, pandan ansyen Premye Minis Jacinda Ardern dekri li kòm yon defansè dwa ak jistis pou Maoris.
Wa Charles III ak Reine Camilla eksprime gwo tristès yo lè yo aprann nouvèl la, souliye enpak dirab Tuheitia sou kilti maori ak sou Nouvel-Zeland.
Tuheitia kite dèyè madanm li, Te Atawhai, de pitit gason yo, Whatumoana ak Korotangi, ak pitit fi yo, Nga Wai hono i te po Paki. Pozisyon monak maori a pa gen dwa ereditè, chèf trib yo ki asosye ak Kingitanga ap nonmen yon nouvo monak jou antèman an.
Comments