FIFA remèt atakan brezilyen ak jwè Real Madrid, Vinícius Júnior, pri "The Best" nan yon seremoni ki te fèt nan Doha, jodi madi 17 desanm 2024 la. Pri sa se yon rekonesans kòm pi bon jwè foutbòl gason pou ane a. Vinícius, ki gen 24 lane, te jwe yon wòl kle nan siksè Real Madrid ane sa a, kote l te kontribye nan viktwa klèb la nan Liga a, Ligue des Champions , ak Super Coupe. Mete sou pèfòmans remakab li ak seleksyon Brezil la, nan Copa América.
Seremoni an fèt yon jou anvan final Koup Entèkontinantal la, ki ap dewoule 18 desanm 2024 la. Pandan l te resevwa distenksyon an, Vinícius te remèsye tout kowekipye ak sipòtè li yo pou sipò san mezi yo ak konfyans yo nan li.
Pri sa raple chemen ekstrawòdinè li depi kòmansman karyè li nan Brezil rive nan nivo elit foutbòl monn nan. Jodi a, Vinícius Júnior pa sèlman reprezante lavni Real Madrid, men tou, yon imaj pwometè pou foutbòl entènasyonal la, gras ak vitès, kreyativite, ak kapasite li pou make gòl.
Malgre tout sa, gen kèk kritik ki fè kòmkwa jwè a t a dwe amelyore konpòtman li sou teren an, ki souvan konsidere kòm twò pwovokatè. Vinícius gen talan, e pri sa a montre li gen potansyèl pou kontinye ekri non l nan listwa foutbòl mondyal la.
Comments