Madi 10 septanm 2024 k ap vini an, , Donald Trump ak Kamala Harris pral fè premye deba yo pou kous prezidansyèl Etazini an. Deba sa a ap gen yon gwo enpòtans paske li ap fèt de (2) mwa anvan eleksyon an. Chak kandida ap prepare ak anpil atansyon, chak avèk yon apwòch diferan pou atire plis sipò votè yo.
Kamala Harris aksepte tout règleman pou deba a, menm si li panse fèmen mikwo kandida yo pandan deba a ka yon dezavantaj pou li. Sa vle di, chak fwa li pap pale, mikwo li ap fèmen, sa ki ka fè li difisil pou fè entèvansyon. Malgre sa, li dakò pou respekte règleman yo nan deba ki ap fèt nan Sant Nasyonal Konstitisyon an nan Philadelphia.
Donald Trump, bò kote pa l, ap itilize yon metòd diferan pou preparasyon deba a. Li chwazi fè “reyinyon politik” olye pou l fè repetisyon fòmèl. Li chita ak konseye li yo pou poze l kesyon epi raple l gwo pwen nan manda li nan Mezon Blanch lan. Objektif ekip li a se fè Trump rete sou sijè politik san li pa fè deklarasyon ki ka pwovoke kritik, tankou pawòl mizojin oswa rasis. Yo vle evite li parèt twò agresif oswa dezòdone.
Deba 10 septanm 2024 lan pral yon gwo moman pou tou de (2) kandida yo, pandan y ap fè dènye ajisteman yo pou prepare. Li enpòtan paske li ap pèmèt votè yo wè ki moun ki pi prepare pou dirije peyi a. Harris ap prepare pou montre li kalm epi poze, pandan Trump ap chache evite pèlen ki ka fè mal imaj li. Se yon estrateji kote chak kandida ap eseye atire plis sipò nan yon kous ki trè sere.
Comments