Tchaka: Manje Konbit, Manje Rezistans.

Nan kizin ayisyèn nan, kèk manje pa sèlman sèvi pou nouri kò a, men yo pote tou yon idantite kiltirèl ak yon istwa ki makonnen ak pèp la. Tchaka, youn nan pi gwo senbòl manje tradisyonèl Ayisyen, se yon plat ki chaje ak vitamin, gou, ak lespri konbit ak solidarite. Se yon ragou ki fèt ak mayi, pwa wouj, vyann kochon oswa vyann bœf, epis natirèl, ak legim, tout sa mijote pandan plizyè èdtan pou bay tout richès ki kache dèyè gou li yo.

Bòl tchaka

Pou kèk pratikan vodou, Tchaka pa yon senp manje; li se yon rityèl. Depi lontan, li te toujou prepare nan gwo okazyon tankou fèt fanmi, seremoni relijye, ak rasanbleman kominotè. Nan listwa pèp ayisyen an, kote lespri konbit te toujou prezan, tchaka te sèvi kòm manje ki makonnen moun ansanm. Lè yon gwoup moun ap travay latè ansanm, yo te prepare tchaka kòm manje ki bay fòs ak enèji. Jiskaprezan, se toujou yon plat ki rasanble moun nan lanmou.

Engredyan ak Gou ki Make Idantite Ayiti

• Mayi: Reprezante lavi ak fòs pèp ayisyen an, paske se yon grenn ki bay anpil enèji.

• Pwa wouj: Yon eleman esansyèl nan kizin Ayisyen ki ajoute gou ak bon jan nitrisyon nan plat la.

• Vyann kochon oswa bèf: Konsève ak sale, li bay tchaka tout karaktè li ak gou espesyal.

• Dlo kokoye (opsyonèl): Li bay tchaka yon konsistans pi krème epi ajoute yon touche ekzotik.

• Legim tankou joumou, malanga ak yanm : Yo mete yon balans ant teksti epi ajoute yon lòt nivo gou.

Epis natirèl (lay, zonyon, tim, piman, lorye...): Se eleman ki reveye tout sans yo epi ki bay tchaka yon idantite gastronomik ayisyen an.

Tchaka: Yon Plat ki Pran Tan, Men Ki pote satisfaksyon.

Yon bon tchaka mande plizyè èdtan preparasyon, paske chak eleman dwe byen kwit pou fè l bay tout gou li yo. Pwa ak mayi dwe tranpe plis pase 10 èdtan anvan pou yo byen gonfle epi vin pi mou. Yo kwit yo ansanm ak epis, pandan vyann nan bouyi apa epi fri nan lwil pou bali plis gou. Finalman, tout eleman reyini pou yo mijote pandan omwen 2 èdtan, jiskaske tchaka a vin byen epè, ak tout teksti li.

Menm jan ak soup joumou, tchaka se yon senbòl rezistans ak eritaj ayisyen. Li pote son rasin afriken ak tout sa ki fè pèp ayisyen an yon pèp ki kenbe tèt li malgre difikilte yo. Chak bouch ki pran yon kiyè tchaka ap fè konesans ak rasin li, kilti travay di, espri kominote, ak kreyativite kizin ayisyen an.Se pa pou granmesi tchaka toujou prezan nan gwo fèt ak rasanbleman. Se manje ki makonnen lajenès ak granmoun ansanm, menm jan li te toujou fèt depi jenerasyon an jenerasyon. Se sa ki fè tchaka pa sèlman yon manje, men yon eksperyans kiltirèl ki makònen Ayiti ak valè li yo.

Redaksyon: Ronalson Bryan Blanfort

#konektem

#toutkotenenpòtkilè