Komin Delmas selebre 42èm anivèsè li dimanch 15 desanm 2024 la, nan kad yon seremoni espesyal ki te òganize nan Palè Minisipal, nan dèlma 33, sou direksyon Majistra Wilson Jeudy.
Etabli kòm komin nan dat 15 desanm 1982, Dèlma pase anpil gwo defi avan li konnen kèk gwo progrè, jan majistra a te raple sa nan diskou li.
Premye sitwayen komin nan te mete aksan sou anpil obstak administrasyon li an fè fas, nan kad amelyorasyon kondisyon lavi sitwayen yo, pandan l pwofite mete aksan sou pwogrè ki fèt yo.
Majistra Wilson Jeudy te pwofite okazyon an pou l felisite devouman ak detèminasyon anplwaye minisipal yo, k ap fè gwo jefò pou rete fidèl ak misyon yo ki se kontinye sèvi abitan dèlmasyen nan yon mannyè ki remakab.
Nan yon atmosfè festivite, ki make ak pèfòmans mizik epi divès lòt aktivite amizan, Palè Minisipal te dekore an blan, nan yon atmosfè ekstrawòdinè pou selebrasyon gran jou sa.
Evènman an te rasanble kòlèg, zanmi ak sitwayen kominal yo, nan yon bèl anbyans san parèy.
Sepandan, majistra a eksprime enkyetid li konsènan ensekirite k ap grandi nan peyi a.
Yon sitiyasyon ki, daprè li, rann sitwayen komin nan pa ka viv byen, sa ki rann tou aktivite ekonomik yo febli anpil.
Comments