Jou ki te samdi 10 dawout 2024 la, estaf Salmis Anite Pierre a te tanmen yon konferans pou laprès nan lide pou anonse ofisyèlman yon pwojè albòm tou nèf ki gen pou soti.
Konferans pou laprès sila a te fèt nan lide pou anonse preparasyon vant siyati senkyèm (5e) albòm salmis la, ki prevwa fèt nan yon gran konsè, jou k ap 18 dawout 2024 la.
Nan konferans sila a, estaf ekip salmis Anite Pierre a te pwofite fè biyografi li, yo prezante l non sèlman tankou yon manman k ap pran swen fanmi li men tou yon chantez ki deside konsakre talan l pou fè louwanj senyè a.
Senkyèm albòm sila a, dapre estaf la, pote tit "Ban m fòm ou vle", yon albòm dapre estaf la ki ankouraje kretyen yo sitou pou lèse yo gide ak pran fòm seyè a ba yo, nan kite volonte l fèt nan lavi nou yo chak.
Pandan konferans pou laprès sila a, Pastè Joël Pierre, responsab an chèf legliz kote konsè a gen pou fèt la,Église Tabernacle Union Baptiste de Nazon, epi manadjè salmis la te tanmen remèsye tout sila yo k te reponn envitasyon pou prezan nan konferans lan. Pandan sa, li te tou pwofite bay kèk detay anplis sou pwojè atis la soti deja yo, tankou non ansyen yo ak non nouvo ki pral soti a, tankou:
1.Jezi se wa k ap mennen an
2.Glwa pou Bondye
3.Anba gras la
4.Temwanaj
Epi senkyèm nouvo albòm nan ki pote non "Ban m fòm ou vle". Mete sou sa, li raple tou, apre pwojè albòm mizik atis la soti deja yo, li genyen tou de (2) videyo mizik ki te soti nan menm pwojè avan yo. Men pou nouvo albòm sila a, ap genyen dis (10) mizik epi yon nouvo videyo ki gentan pare deja.
Sa ki fè yo lanse yon envitasyon espasyal bay tout moun ki t a enterese pou vin sipòte pwojè sa.
Boutofen, Estaf la anonse prezans plizyè atis nan monn evanjelik la k ap gen pèfòme nan konsè sa, tankou : Wiliadel Denervil, Pasteur Joël Léon, Joy Clerf Dérisier, Elteau Etienne, Hosanna Dance, Atta Dance ak Dj Sagesse.
Estaf la fè konnen ak senpman 500 goud w ap ka achte kat k ap ba w aksè pou vini nan konsè a, kote vant siyati a ap pwofite fèt la, nan jou k ap dimanch 18 dawout la, nan "Église Tabernacle Union Baptiste de Nazon" an, depi 3zè nan lapremidi.
Yon okazyon pou gran piblik la kapab vin fè konesans plis toujou ak atis Anite Pierre nan vant siyati nouvo pwojè albòm mizik li a.
Comments