Romário de Souza Faria, yon ansyen atakan brezilyen ki se yon senatè nan peyi Brezil deklare, l ap retounen sou teren foutbòl kòm yon jwè pwofesyonèl. Apre 15 lane depi l te pran retrèt li. Romario deside mete kranpon pou tranble filè gadyen yo.
Romario se prezidan ekip foutbòl America- RJ nan dezyèm divizyon Rio de Janeiro. Non prezidan an fè pati de non jwè ki anrejistre pou jwe sezon sa a ak ekip la tou. Se Federasyon Foutbòl Rio de Janeiro ki konfime enskripsyon chanpyon mondyal 1994, epi federasyon an anonse Romario ap resevwa yon salè minimòm.
Romario pa nouvo nan mond foutbòl la,
pandan tan li nan domèn espò a, li te jwe plis pase 70 match pou peyi Brezil soti 1987 rive 2005, ak 56 gòl, chanpyon mondyal, Koup amerika. Li te sevi nan pote koulè plizyè klèb tankou: Vasco da Gama, Flamengo, ak Fluminense nan Brezil, ansanm ak Barcelone, Valence nan peyi Lespagn, epi PSV Eindhoven nan peyi Lawoland.
Men, an 2008, Romario te deside pran retrèt li kòm jwè aprè pou l te lanse yon karyè politik. Li rive depite Rio de Janeiro pandan twazan 1er fevriye 2011-31 janvye 2014 ak senatè depi 1e fevriye 2015 jiskaprezan. Kòm palmantè li rive dirije yon envestigasyon sou koripsyon nan foutbòl brezilyen an nan Kongrè.
Men kounye a, li detèmine retounen sou teren kòm yon jwè.
Anpil moun manifeste enkyetid yo sou ki jan senatè ap rive fè ekilib ant foutbòl la ak politik la. Men Senatè an fonksyon an afime jwe foutbòl p ap anpeche l nan okenn fason.
Objektif li se jwenn opòtinite pou li jwe ak pitit gason l Romarinho ki se youn nan jwè
Amerika-RJ. Romario ak pitit gason Romarinho deja patisipe nan kèk seyans antrenman yo ansanm.
Romario kwè ekip li a ka chanpyon dezyèm divizyon an epi rive jwe nan elit foutbòl Eta Rio de Janeiro nan peyi Brezil.
Comments