Apre yon sispansyon ki te dire 40 jou, rezo sosyal X, ansyen Twitter, retounen disponib nan peyi Brezil depi madi 8 oktòb 2024 nan aswè. Rezo a te bloke apre yon desizyon Jij Lakou Siprèm Alexandre de Moraes, ki te pran mezi sa a nan dat 30 out 2024, kòm yon pati nan lit kont dezenfòmasyon.
Pou rekomanse fonksyone nan peyi Amerik Latin nan, rezo X te oblije satisfè kondisyon yo, ki gen ladan efase kont yo sispek ki te akize de gaye fo enfòmasyon, sitou pami sipòtè ansyen prezidan ekstrèm dwat Jair Bolsonaro. Platfòm lan te tou peye yon amann ki totalize 28,6 milyon reyal (anviwon 4,8 milyon ewo) epi te nonmen yon nouvo reprezantan legal nan Brezil.
Itilizatè yo te montre anpil antouzyasm pou retou platfòm lan. Mo kle tankou “Voltamos” (“Nou retounen”) ak “Como é bom estar de volta” (“Li bon pou retounen”) te anvayi rezo sosyal la pandan diskisyon yo t ap dewoule.
Desizyon pou leve sispansyon an te pran madi swa apre platfòm la te konplètman konfòme li ak egzijans legal Lakou Siprèm lan, sa ki pèmèt X retounen nan vi sosyal ak politik peyi Brezil.
Comments