RCIA revele Ayiti bezwen 1.34 milya pou fè fas ak Kriz ki frape Peyi a.

Rapò sou Evalyasyon Rapid ak sou Enpak Kriz la (RCIA) revele Ayiti bezwen 1.34 milya dola sou de (2) lane pou fè fas ak kriz sekirite ki frape peyi a. Evalyasyon sa a mete aksan sou gwo domaj popilasyon an, enfrastrikti yo, ak ekonomi an sibi, sitou nan zòn Pòtoprens ak Latibonit.

Premye Minis Alix Didier Fils Aimé deklare nesesite pou mete anplas, prese prese, aksyon solid ki pral garanti estabilite ak relèvman ekonomik. Avèk yon PIB ki bese 8.5% depi 2015, Minis Ekonomi Alfred Fils Metellus te soulinye enpòtans pou konsantre resous yo sou zòn ki pi afekte yo.

Pou reponn ak kriz la, gouvènman an pwopoze yon plan aksyon 2025-2026 ki gen kat priyorite kle:

Divèsifikasyon ekonomik pou diminye depandans peyi a sou kèk sektè.

Reyabilitasyon enfrastrikti pou reponn ak domaj ki fèt.

Ogmantasyon aksè ak swen sante ak edikasyon pou soulaje popilasyon an.

Ranfòse "État de droit" pou garanti sekirite ak jistis.

Yon konferans entènasyonal avèk patnè ak donatè yo prevwa nan kòmansman ane 2025 lan, pou mobilize finansman ki nesesè pou yon relèvman dirab. Sa make yon etap esansyèl nan jefò rekonstriksyon peyi a pandan li ap fè fas ak youn nan pi gwo defi istorik li yo.