Dosye Hunter Biden nan vin pran yon lòt dimansyon, apre Prezidan Joe Biden anonse dimanch premye desanm nan gras prezidansyèl total, pitit gason li an. Pwokirè Federal David Weiss, ki responsab ankèt yo, rejte desizyon sa, pandan li defann entegrite travay li nan dokiman legal li depoze nan eta Kalifòni ak Delaware. Weiss denonse desizyon sa, li konsidere kòm yon jefò pou politize dosye a, epi li demanti pawòl ki fè konprann ankèt yo te gen motivasyon politik.
Hunter Biden ap fè fas ak akizasyon fwod fiskal, nan yon tribinal federal nan Kalifòni epi posesyon ilegal zam nan Delaware. Weiss fè konnen akize a te fè uit (8) demann pou anile akizasyon fwod fiskal yo, men tout te rejte.
Gras prezidansyèl la soulve gwo kesyon sou endepandans lajistis la. Pandan kanpay li, Prezidan Joe Biden te deklare li pa t ap entèvni nan okenn pwosè kont pitit li, men desizyon sa a vini nan yon moman kritik kote li pral kite "Maison Blanche" lan. Koulye a, li depann de jij Mark Scarsi nan Kalifòni ak Maryellen Noreika nan Delaware pou deside sou akizasyon yo, yon etap enpòtan pou gras la a vin plen efè.
Sitiyasyon sa a mete lajistis ak politik nan yon pozisyon difisil, pandan piblik la ap suiv konsekans desizyon sa a ak anpil atansyon.
Comments