Ayè dimanch 28 jiyè 2024 la, Konsèy Nasyonal Elektoral (KNE) nan peyi Venezyela anonse Nicolas Maduro genyen eleksyon prezidansyèl yo epi pran yon twazyèm manda youn kole ak lòt. Prezidan Maduro genyen eleksyon sa yo a 51.2% vòt kont 44.2% vòt pou kandida opozisyon an Edmundo Gonzalez Urrutia.
Yon rezilta nimewo opozisyon Venezyelyèn Maria Corina Machado denonse ak tout fòs li. " Nou genyen eleksyon prezidansyèl a 70% vòt yo, Venezyela gen yon prezidan tou nèf non li se Edmundo Gonzalez Urrutia. Tout moun konn sa ki pase a dimanch lan epi lè m di tout moun konnen an, m di tou rejim Maduro a konnen byen sa k pase a epi kominote entènasyonal la wè sa k pase a tou."
Plizyè moun nan kominote entènasyonal la eksprime dout yo sou rezilta eleksyon an sila, prezidan Chili Gabriel Boric se premye moun ki denonse viktwa Maduro a. Sekretè Deta Ameren an li menm Antony Blinken bay pozisyon ameriken yo sou rezilta eleksyon an jodi lendi 29 jiyè a "Nou pè pou rezilta eleksyon prezidansyèl sa yo pa makonnen ak vòt pèp Venezyelyen".
Yon lòt bò plizyè peyi patizan Maduro tankou prezidan Kiben an Miguel Diaz-Canel, prezidan Nikaragwa a, Daniel Ortega, prezidan Bolivyen an Luis Arce ak prezidan Onndiras Xiomara Castro kontinye sipòte Maduro epi salye twazyèm viktwa youn kole ak lòt ansyen kalye pòlka Hugo Chavez la a. N ap raple peyi Venezyela anba yon kriz ekonomik san parèy epi yon esntabilite politik ki anpeche pwogrè ekonomik nan peyi pwodiktè petwòl la.
Comments