Prezidan ameriken an Joe Biden deklare mèkredi 4 septanm 2024 la "Etazini pa ka aksepte fiziyad nan lekòl vin tounen yon bagay nòmal," pandan l ap eksprime tristès li apre lanmò plizyè moun nan yon fiziyad ki fèt nan yon lise touprè Atlanta. "Sa ki te sipoze yon rantre lekòl kè kontan nan Winder, Georgia, tounen yon move rapèl: vyolans ak zam kontinye detui lavi konpatriyòt nou yo," li ajoute, pandan l ap fè apèl bay Kongrè a pou pran aksyon, espesyalman pou entèdi fizi otomatik.
Vis-prezidant Kamala Harris te pran lapawòl tou, mande pou pran aksyon desizif kont vyolans ki fèt ak zam, kèk èdtan sèlman aprè fiziyad nan yon lise ki lakòz kat (4)moun mouri. "Nou dwe mete fen nan epidemi vyolans ak zam sa nan peyi nou yon fwa pou tout," li deklare pandan yon diskou kanpay nan Eta New Hampshire.
Otorite yo fè konnen sispèk ki arete nan fiziyad sa a, ki fèt nan yon lise toupre Atlanta, se yon elèv ki gen 14 lane. Pandan yon konferans pou laprès, Chris Hosey, direktè biwo ankèt Eta Georgia, presize ke adolesan an te rann tèt li yon ti tan apre entèvansyon fòs de lòd yo e "lap fè fas ak akizasyon pou asasina". Kat viktim yo se de (2) elèv ak de (2) pwofesè.
댓글