Premye Minis Burkina Faso a Jwenn revokasyon l nan yon kontèks enstabilite politik.

Nan yon desizyon ki souke sèn politik peyi a, Prezidan tranzisyon Burkina Faso a, kapitèn Ibrahim Traoré, siyen yon dekrè vandredi 6 desanm nan, ki mete fen nan manda Premye Minis Apollinaire Joachim Kyélem de Tambèla ak gouvènman li.

Sa vini nan yon moman kote peyi a ap fè fas ak gwo enstabilite. Nan mwens pase de (2) zan, Burkina Faso te viv de (2) koudeta youn apre lòt. Dènye koudeta a, ki te fèt nan mwa septanm 2022, te mete kapitèn Traoré sou pouvwa a, pandan li te konfye Kyélem de Tambèla plas Premye Minis la.

Depi plis pase yon lane, Kyélem de Tambèla t ap dirije twa (3) gouvènman youn apre lòt. Men, yo revoke l nan yon kontèks kote kriz sekirite a ap agrave. Atak gwoup ame djihadis yo kontinye touye plizyè milye moun epi fòse plizyè santèn ak milye lòt moun kite kay yo.

Desizyon sa a soulve enkyetid sou avni politik ak sekirite Burkina Faso, yon peyi ki deja ap soufri anba tansyon entèn ak gwo difikilte ekonomik.