Nan yon rankont enpòtan ki te fèt 28 novanm 2024 la, nan Pòtoprens, Premye Minis Alix Didier Fils Aimé, te reyini ak manm Komite Pilòt Konferans Nasyonal la. Rankont sa a te make yon nouvo etap nan jefò gouvènman an ap fè pou reyalize yon refòm nasyonal ki chita sou revizyon Konstitisyon ak pwopozisyon yon nouvo pwojè sosyete.
Premye Minis lan te pwofite moman sila pou felisite manm komite a pou angajman yo nan kontinye travay sou tranzisyon peyi a. Li te mete aksan sou pwogrè yo deja reyalize, espesyalman nan preparasyon eleksyon kap vini yo, ki, dapre li, reflete yon angajman solid pou akonpli misyon komite a.
Komite Pilòt la kontinye fè chemen li atravè yon seri konsiltasyon ak kèk aktè kle nan sosyete ayisyèn nan. Pami yo gen pati politik yo, òganizasyon fanm yo, ak inivèsite yo, ki pote kontribisyon yo pou asire refòm yo reflete bezwen ak aspirasyon pèp la. Premye Minis lan te renouvle angajman li pou respekte yon fèy wout ki gen twa aks prensipal: sekirite, refòm konstitisyonèl, ak eleksyon lib, san paspouki.
Rankont sa a montre yon volonte klè pou angaje tout sektè yo nan yon dyalòg ki kapab mete Ayiti sou wout chanjman dirab.
Comments