PNH la ankouraje ayisyen, otorite Dominikèn ap depòte yo pou vin fè deklarasyon nan enstitisyon an.

PNH la atravè Delegasyon Depatmantal Lwès (DDO) lanse yon apèl enpòtan pou tout sitwayen ayisyen otorite nan Repiblik Dominikèn depòte yo pou fè yon deklarasyon ofisyèl nan yon komisarya Lapolis. Sa ap ede PNH la nan pwosesis pou jere rantre ak sòti nan rejyon an epi pi byen garanti sekirite popilasyon an.

PNH la ap konseye moun yo mande yon dokiman ki ap ede yo retounen nan peyi a san okenn difikilte. Dokiman sa a ka gen ladan enfòmasyon sou idantite yo ak detay sou vwayaj la.

PNH la ap mande tou nenpòt moun ki sòti nan lòt depatman, tankou Latibonit, pou yo pote yon pyès idantite avè yo. Sa a esansyèl pou pwouve idantite yo ak fasilite vayevyen yo.

Pou moun ki pa gen pyès idantite oswa ki gen difikilte pou jwenn dokiman sa yo, PNH la rekòmande yo vizite biwo DDO a, ki nan Kanapevè Pòtoprens. Nan biwo sa a, yo ka jwenn asistans, konsèy, ak plis enfòmasyon sou kijan pou avanse nan pwosesis la.

Deklarasyon sa a enpòtan, sitou nan yon kontèks kote sekirite se yon priyorite. PNH la ap fè efò pou asire tout resòtisan sitwayen yo ka fonksyone nan peyi a san pwoblèm epi an sekirite. Se poutèt sa, li esansyèl pou swiv pwosedi ki nesesè.