Polis Nasyonal Ayiti (PNH) ap kontinye gwo operasyon nan depatman Latibonit, pou konbat gang ame yo k ap fè ravaj nan zòn nan. Nan Savyen, kote lapolis reprann kontwòl komisarya a, anpil manm gang yo blije kouri kite zòn nan depi plis pase de (2) semèn.
Operasyon sa yo, ki sou kontwòl Direktè Jeneral PNH la, Rameau Normil, vize kraze gang yo pou yo kapab garanti sekirite nan kapital la, Pòtoprens. Nan Latibonit, gang "Gran Grif" « Luckson » ap dirije se youn nan sib prensipal yo. Jou ki te 17 desanm nan, inite espesyal tankou UTAG, BOID, ak UDMO lanse yon gwo atak nan plizyè kote estratejik, sa ki pèmèt yo reprann Palmis, yon zòn ki te anba kontwòl gang Jonas.
Daprè PNH, plis pase yon dizèn manm gang yo pèdi lavi yo pandan operasyon yo. Lapolis ap avanse kounye a nan direksyon Savyen, yon lòt bastyon enpòtan gang ak zam yo. An menm tan, Rameau Normil fèk retounen soti nan peyi Kolonbi, kote li t al finalize acha materyèl enpòtan pou ranfòse kapasite PNH la. Jefò sa yo, daprè opinyon plizyè moun, deja kòmanse montre rezilta pozitif sou teren an.
Comments