6 mai 20232 min de lecture

Peze nan dòmi, Anpil moun konsidere fenomèn sa Mistik, Kisa lasyans ak lamedsin di nan sa ?

Anpil nan nou konn tande moun kap pale de fenomèn peze nan dòmi an, moun ki fè eksperyans lan deja dekri sa yo viv la kòm yon gwo chay lou yo santi ki peze pwatrin yo pandan yap dòmi gen moun ki konn di yo santi bouch yo plen dlo yo pa ka pale se lè yo rele Jezi yo konn santi yo delivre.

Jodi a konekte m vin pataje ak ou sa lamedsin di sou fenomèn sa gras ak rechèch syantifik yo. Pou w konprann pi byen ann gade avan tou diferan sik somèy yo.

Yon sik somèy dire 90 a 120 minit anviwon E li genyen diferan stad ladanl;

"Somèy Lan" (Sommeil Lent)
"Somèy Pwofon" (Sommeil Profond)
"Somèy Paradoksal' (Sommeil Paradoxal)

Nan ka pa nou an, se somèy paradoksal la ki plis entèrese nou.

"Somèy Paradoksal" (Sommeil Paradoxal)

Se yon faz, kote ou nan dòmi, manb ou yo pa ka fè mouvman, "misk" (muscle) ou yo paralize, akoz gen yon molekil ki libere nan kòw ki se yon "neurotransmetteur" ki rele "glycine", ki la pou anpeche Kòw fè mouvman pandan ou nan somèy Paradoksal la men sèvo a toujou aktif, li an evèy.

Nan faz somèy sa, sa konn rive ge moun, pou yon rezon kèlkonk ki vin reveye, e lè sa rive ou konn gen lide pou w bouje oswa leve, malerezman ou pap kapab paske kò a paralize. Tank wap konsyan de eta w, ou pè, tout anvi w se leve, ou goumen, ou redi, ou lite, se byen domaj ou pap ka leve E se lè sa wap kòmanse vin pè, wap santi kò w ap pike w, wap santi yon pwa lou ap peze pwatrin ou, souf ou ap koupe, tankou moun ki pral trepase.

Pafwa moun nan ka genyen tou "Alisinasyon"; tout sa ki antourel defóme, li wè yo gen lót fóm. Alisinasyon yo ka vizyèl, odyovizyèl, taktil. Sa vle di ou ka tande vye bri, wè vye bèt, touche vye bagay, men se nan lespriw yo ye.

Peze nan dòmi (Paralysie du sommeil)

ka rive tout moun men se pa souvan, li pi frekan kay moun ki strese, ki enkyè moun ki toumante, ki dòmi fatige e kouche sou do, moun ki dòmi ak limyè, moun ki pran dròg ak moun ki pa gen dòmi ase.