Otorite nan Peyi Etazini òganize yon semèn seremoni pou rann omaj ak ansyen prezidan Jimmy Carter, ki mouri 29 desanm, a 100 lane. Seremoni sila ap dire sis (6) jou, epi l ap fini ak fineray nasyonal la nan Washington, anvan yo antere l nan kote l wè premye jou li, nan Eta Georgie.
Jimmy Carter, 39yèm prezidan ameriken an, kite yon tras inik nan listwa parapò ak angajman l pou defann dwa moun ak lapè. Sou manda li, li te denonse rejim militè yo nan Amerik Latin nan, retire sipò Etazini pou diktati Somoza nan Nikaragwa, epi fasilite retounen kanal Panama bay otorite panameyen yo. Li te relanse tou relasyon diplomatik ak Kiba, atravè yon kolaborasyon istorik ak Fidel Castro.
Seremoni yo te kòmanse nan Plains, vil natal li, kote sekirite yo te pote sèkèy Carter pou mache nan lari vil la. Abitan yo te salye kòtèj la avèk drapo yo. Yon jès senbolik fèt nan fèm pistach kote Carter te grandi, kote yo te sonnen yon klòch 39 fwa. Sèkèy la gen pou pran direksyon Atlanta, nan Capitole Georgia a, kote yo pral obsève yon minit silans nan non li. Yo pral vizite Carter Center a tou, kote popilasyon an ap ka rann omaj li yon dènye fwa.
Jou k ap Madi 7 Janvye a, yo pral transpòte l nan Washington, anba misyon espesyal "Special Air Mission 39," kote li pral ekspoze nan Rotond Capitol la pou piblik la rasanble. Apre sa, fineray yo ap fèt jedi nan Katedral Nasyonal Washington nan. Prezidan Joe Biden pral pwononse elòj finèb li, ansanm ak prezans ansyen prezidan Clinton, Bush, Obama, ak Trump.
Apre fineray la, nan Washington, kò Carter ap retounen nan Plains pou yon dènye omaj prive nan legliz kote li te anseye katechis. Li pral antere bò kote madanm li Rosalynn, ki te mouri an 2023.
Nasyon an, atravè omaj sa yo, kontinye selebre yon lidè ki te konsakre lavi li pou lapè ak jistis.
Comments