Fen semèn ki sot pase a te make ak yon vag vyolans san parèy nan zòn metwopolitèn nan, sitou nan zòn nazon, ba dèlma, kriswa... Nan Lopital Inivèsitè La Paix, ki chita kò l nan Delmas 33, plis pase 30 moun blese anba bal t al pran swen, pami yo, yon timoun ak yon adolesan ki te blese grav nan tèt. Daprè Dr Paul Junior Fontilus, direktè egzekitif lopital la, sitiyasyon a vin mete yon presyon san parèy sou enstitisyon an, ki deja ap lite pou jere kantite pasyan k ap ogmante.
Malerezman, batay ant gwoup gang yo ak fòs lòd yo, te lakòz twa (3) mò, pami yo de (2) polisye ki pèdi lavi yo pandan yon echanj vyolan kout zam ak manm yon kowalisyon gang ki rele "Viv Ansanm." Gwoup sa a kontwole plizyè katye estratejik nan kapital la.
Vyolans san fen sa yo kontinye agrave kriz sistèm sante Ayiti a. Pandan lopital yo ap eseye pran swen blese nan fiziyad yo, yo oblije jere tou pasyan ki gen lòt maladi. An menm tan, anpil lòt sant sante nan zòn nan swa pa an fonksyon, osnon enposib pou jwenn aksè akoz ensekirite k ap devaste rejyon an.
Sitiyasyon dramatik sa a klèman montre nesesite pou gen entèvansyon kowòdone pou restore sekirite ak ranfòse kapasite sistèm sante peyi a. Kapital la, ki anba kontwòl gang ak kote popilasyon sivil la sibi gwo chay vyolans, bezwen aksyon ijan pou amelyore kondisyon lavi ak sante piblik. San yon repons rapid ak efikas, kriz sa a ap kontinye mete lavi anpil moun an danje, pandan sistèm sante a ap soufri konsekans yon presyon yo paka sipòte.
Comments