Mwa sa a, nou prezante yon palmarès ki pote yon nouvo dinamik nan mond mizik evanjelik la. Avèk 19 mizik/videyo tout nèf, ki gen ladan twa (3) koral ; MAHANAIM, SYMPHONIE ak DEG.
Chak mizik reflete yon enèji ak yon pasyon ki pral manyen kè moun k ap gen pou tande yo. Kit se ritm, mesaj pwisan, oswa enspirasyon ki soutni lavi espirityèl, seleksyon sa a gen tout sa yon moun bezwen pou ede l grandi nanm li.
Se yon bèl okazyon pou nou dekouvri ansanm nouvo talan, felisite devouman atis yo, epi ankouraje kreyativite nan ministè mizik evanjelik la. Nou envite w plonje nan Palmarès Septanm 2024 la, epi kontinye sipòte travay atis yo pou yo ka kontinye enspire nou tout.
Zèv atis yo:
1. ROSSYNY BRENELUS Feat. WAYNE MONDELUS - "Ba Li Glwa".
Rossiny Brenelus, chantè prensipal gwoup Revelasyon Mizik, mete disponib yon nouvo videyo ofisyèl ki gen pou tit “Ba Li Glwa” an kolaborasyon ak Wayne Mondelus, ki soti 1 septanm 2024. Mizik sa a, gen ladan l melanj ritmik konpa ak zouk, mete aksan sou kwayans kretyen ak enpòtans pou kenbe lafwa ak konfyans nan BonDye menm nan pi gwo eprèv lavi yo.
Nan "Ba Li Glwa," Brenelus dekri kijan kretyen yo dwe kontinye mache avèk lafwa malgre difikilte ak eprèv yo ka fè fas pandan lavi yo. Mizik la fè referans ak istwa Biblik twa jèn ebre yo ki te refize abandone lafwa yo malgre menas lanmò kit e plane sou vi yo. Yon listwa, ki byen dekri nan senaryo videyo ki gen yon aspè yon teyat ki byen elabore. Senaryo bay vi ak diferan pèsonaj kle ki dekri nan Danyèl 3 a, tankou Wa Neboukadneza ak madanm li ki entèprete pa Mecca Grimo ak Berline B, pandan wòl twa jèn Ebre yo atribye a Wayne Mondelus, T-Sonny, ak Rossiny Brenelus. Lespri BonDye kit e sèvi kòm katriyèm pèsonaj nan founèz la entèprete pa Amos Jn Glaude. Epi Wòl sòlda yo ak sèvitè wa a jwe pa Witz Hilaire, Shu Petion, ak Sherley-Malaicka L.
Ak yon mesaj ki pouse refleksyon, "Ba Li Glwa" raple fidèl yo ke lafwa fèmen pòt lanmò, epi BonDye toujou pare pou delivre sa ki mete konfyans yo nan Li. Videyo a pa sèlman reyisi nan pwofondè espirityèl li, men li ajoute yon dimansyon vizyèl ki ankouraje espwa ak rezistans nan lavi chak kwayan.
2. PALMYRE SERAPHYN - "Ouvè Pòt Yo".
Palmyre Seraphin, se pami yon ti ponyen atis feminen malgre k ap viv sou teritwa ameriken an rive fè enpak an Ayito ak plizyè hits tankou "Se sou li mwen kanpe" ak "Li ka fèl," kontinye pwodui epi prezante ak gran piblik lan "Ouvè Pòt Yo," ki soti 1er septanm 2024.
Chante sa a sèvi kòm yon apèl pwofon pou tout moun ki nan bezwen pou chèche BonDye kòm gid ak defansè nan moman difikilte.
“Ouvè Pòt Yo” raple nou malgre limit Lòm yo, Bondye gen pouvwa pou louvri chemen ki sanble fèmen epi ki enposib pou louvri yo.
3. CLAIRE CALIXTE Feat. FRÈ GABE "Mennen Mennen Nèt".
“Mennen Mennen Nèt,” yon kolaborasyon ant Claire Calixte ak Frè Gabe, se yon mizik ki pote yon mesaj fò sou rezilyans ak liberasyon nan Kris. Videyo ofisyèl la, ki te soti 3 septanm 2024, montre yon vwa ki leve kont advèsite, ak yon lespwa fèm nan Jezi.
Nan chante a, Claire Calixte ak Frè Gabe mete aksan sou nesesite pou konfwonte difikilte yo ak kouraj. Yo fè konnen menm nan moman ki pi fènwa yo, Jezi se yon gid ki toujou la pou mennen yo sou chimen viktwa a.
4. BOAZ SAINVILUS - "Sakrifis Vivan".
Boaz Sainvilus soti videyo ofisyèl nouvo mizik li ki gen pou tit “Sakrifis Vivan,” ki sòti 7 septanm 2024. Chante sa a, ki ekri ak chante pa Boaz Sainvilus, pote yon mesaj pwisan sou delivrans ak renouvèlman espirityèl.
Nan “Sakrifis Vivan,” Boaz Sainvilus raple nou ke menm nan moman pi difisil yo, BonDye la pou delivre nou ak bay lespwa.
Pawòl yo eksprime dezi pou yon relasyon pi fò ak BonDye, mete aksan sou enpòtans sakrifis ak devosyon. Mete sou sa videyo a gen yon dimansyon vizyèl ki soutni mesaj sa a, montre pwosesis liberasyon an.
Avèk “Sakrifis Vivan,” Boaz ankouraje tout moun pou yo ouvri kè yo ak kwè nan pouvwa delivrans BonDye.
5. WISLANDE MOROSE Feat. BEETHOVEN CHENET - "Tout Mwen Menm".
“Tout Mwen Menm” se yon mizik kote Wislande Morose ak Beethoven Chenet fè lwanj ak devosyon total ak BonDye. Videyo ki akonpaye mizik la, pibliye nan dat 7 septanm 2024, montre yon relasyon sakrifis kote tout lavi yon moun dedye ak sèvis BonDye.
Nan mizik sa a, atis yo eksprime yon lanmou san limit pou BonDye, kote yo envite tout moun tande apèl pou bay BonDye tout sa yo ye, san rezèv. Emmanuel PointDuJour, ki ekri tèks la, fè nou sonje enpòtans pou bay BonDye tout sa ki nan nou, pou nou ka viv yon vi ki chaje ak lafwa.
6. DELLY BENSON - “Sentespri”.
Salmis pastè Delly Benson soti videyo ofisyèl mizik Sentespri, ki se katriyèm mizik sou albòm “Mwen Son Chanpyon,” jodi samdi ki te 7 septanm 2024 la. Mizik sa a pote yon mesaj ki gen anpil pwofondè sou pouvwa ak prezans Sentespri.
Chante a kòmanse ak yon deklarasyon sou pouvwa BonDye, ki san rival ak san limit. Pawòl yo enspire kwayan yo pou yo rekonèt Sentespri kòm fòs ki pi fò a, yon defansè ki toujou la pou gide ak klere chemen yo.
Melodi a ak ritm lan envite tout moun pou adore ak onore BonDye, pandan y ap envoke prezans Li nan lavi yo.
Imaj yo nan prodiksyon an ranfòse mesaj lan, avèk adorasyon nan prezans BonDye. “Sentespri” se yon mizik ki gen kapasite pou leve lespri moun ak fè yo reyalize enpòtans lafwa ak angajman nan relasyon yo ak BonDye.
7. FRÈ VIO L’EVANGELISTE - “Lettre Aux Chrétiens”.
"Lettre aux Chrétiens" se yon mizik kote Frè Vio L’Évangéliste adrese yon apèl ijan bay kominote kretyèn nan pou yo reveye epi retounen nan prensip esansyèl lafwa a. Videyo ofisyèl la, soti 7 septanm 2024, reflete mizik sa a kòm yon kri kè kont enfliyans negatif ak tantasyon ki kontinye pran plas nan legliz yo.
Nan tèks la, Frè Vio poze kesyon enpòtan sou eta espirityèl fidèl yo. Atis la remake gen anpil moun ki di yo kretyen ki manke Kris nan lavi yo pandan yo kite dezi mond sa a dirije aksyon yo. Li kritike divizyon nan legliz yo ak feblès lafwa ki fè anpil kretyen pèdi kontak ak misyon reyèl yo, ki se pou fè enpak nan sosyete.
Mesaj la klè: Frè Vio ap rele kretyen yo pou yo reflechi, revize fason yo ap viv ak jan yo mennen lafwa yo. Li ankouraje yon retou nan ansèyman Kris la, kote limyè verite a dwe briye pi fò epi legliz la dwe reprann plas li kòm yon enstriman delivrans ak konvèsyon.
8. JOB ZÒN PA FÈ MOUN Feat. SALOMON LIRA - "You Can Do It”.
“You Can Do It,” ki sòti nan dat 10 septanm 2024, se yon mizik ki pote yon mesaj enspirasyon ak lespwa. Ekri pa Salil ak Frè Alexis, mizik sa a reponn a bezwen moun ki ap fè fas ak difikilte nan lavi yo.
Pawòl yo adrese doulè ak difikilte ke anpil moun ap fè fas, ankouraje yo pou yo pa abandone. Chante a raple yo ke yo pa poukont yo, paske Jezi toujou la pou sipòte yo. Kòm yon gid, pawòl la mande pou yo leve tèt yo ak pran desizyon ki pozitif, malgre tout sa yo ka travèse.
Melodi a, ki gen yon ritm ki enèjik, pèmèt ou santi yon enèji pozitif ki motive w pou kontinye batay yo. Repètisyon fraz “You can do it” ajoute yon eleman dinamik, ki fè w reyalize kapasite w ak potansyèl w.
“You Can Do It” se yon apèl pou tout moun pou yo kwè nan tèt yo ak nan pouvwa BonDye, ki toujou la pou ede yo ak delivre yo nan moman difikilte.
9. ROSE REBECA SAINT- GEORGES Feat. FRÈ ALEXIS - ”Ou Pwisan.
"OU PWISAN" se premye single Rose Rebeca Saint-Georges, ki sòti 12 septanm 2024, an kolaborasyon ak frè Alexis. Videyo lirik sa a selebre pouvwa BonDye kòm Wa tout Wa.
Nan chante a, pawòl yo mete aksan sou majeste BonDye, montre ki jan Li ka fè tout bagay vin posib. Li raple nou ke lè BonDye pale, tout bagay tranble, e pa gen okenn fòs ki ka kanpe devan Li.
Rose Rebecca ak Fr Alexis sèvi ak vwa yo pou bay lespwa ak fòs, ankouraje kwayan yo pou yo konfwonte difikilte ak kouraj. "OU PWISAN" se yon envitasyon pou onore BonDye pou tout sa li fè nan lavi nou.
10. ALTHIEU JEAN BAPTISTE Feat. CLAIRE CALIXTE - “BonDye w Mèvèye”
Nouvo videyo mizik “BONDYE W MÈVEYE,” ki sòti 14 septanm 2024, se yon kolaborasyon ki remakab ant Althieu Jean Baptiste ak Claire Calixte. Mizik sa a ofri yon mesaj pwisan sou adorasyon, glorifikasyon, ak lanmou BonDye ki mèvèye.
“BONDYE W MÈVEYE” se yon pwoklamasyon ki montre san parèy lanmou BonDye genyen. Mizik la melanje ant rekonesans ak adorasyon, kreye yon atmosfè ki anrichi kè nou ak lespwa. Atis yo itilize vwa yo pou envite tout moun onore ak adore BonDye, ki kontinye fè bagay ki inoubliyab nan lavi nou.
11. KORAL MAHANAIM - “Yon Lòt Idantite”
Koral Mahanaim gwosi repètwa l ak yon videyo mizik ki rele “Yon Lòt Idantite” nan dat 14 septanm 2024. Mizik la, pote yon gwo mesaj sou chanjman ak transfòmasyon nan Kris, ankouraje tout moun pou yo aksepte idantite tout nèf yo a nan BonDye, malgre tout difikilte lavi.
Se yon kantik ki bay esperans epi ki raple nou ke nan Kris nou ka toujou jwenn yon nouvo depa.
12. WORSHIP TEAM AGAPE - “Kontwole Lavi M”
Worship Team Agape mete deyò yon videyo lirik ki titre "Kontwole Lavim" ki soti 15 septanm 2024. Nan mizik sa a, yo eksprime yon dezi pwofon pou remèt chak aspè nan lavi yo nan men Kris. Chak pawòl temwanye yon priyè pou mande Jezi pou domine lavi yo, anvayi kè yo ak glwa Li epi kouvri yo ak prezans Li.
Chan sa a envite nou tout pou lage tout bagay nan men BonDye. Se yon envitasyon pou chèche fòs anba zèl BonDye vivan an , sekirite anba pouvwa Li ak jwi gras Li chak jou.
13. ESTHER CHERUBIN-PAURICE Feat. DYNA CHERUBIN - “Victory”
“Victory” se tit mizik tout nèf Esther Cherubin-Paurice soti nan dat 20 septanm 2024. Se yon kolaborasyon avèk Dyna Cherubin nou jwenn yon mesaj ki baze sou lespwa ak konfyans. Se yon mizik ki soti nan kè Esther. Li vle raple nou menm nan mitan gwo zeprèv ak tribilasyon, nou kapab mande viktwa nou nan Kris.
Mizik sa a se yon apèl pou n kenbe lafwa, pou kwè BonDye deja akonpli tout sa nou mande nan lapriyè. Esther Cherubin-Paurice, se konpozitè mizik la, li sèvi ak pawòl pwisan pou motive chak kwayan yo pou leve epi reklame viktwa yo malgre difikilte yo.
14. CELIGNY DATHUS - “Malgre Tou”
Celigny Dathus soti nouvo videyo mizik li, “MALGRE TOU,” jou ki te 20 septanm 2024. pwojè sa a pote yon mesaj sou padon ak gras, eksplore konplèksite nan relasyon ant moun ak BonDye.
Nan “MALGRE TOU,” Celigny reflechi sou batay pèsonèl li ak peche, li adrese leson sou kòman aksyon li yo ka atriste Sentespri a, malgre tout efò li fè pou fè byen. Mizik la montre yon kontras ant santiman koupab li ak lanmou ki toujou rete nan kè BonDye pou li. Li raple nou ke, menm lè nou fè erè, BonDye pa chwazi kondane nou; Li ofri nou gras san mezire.
« Malgre tou » se yon mesaj pou tout moun ki santi yo sal ak imilye, pou yo sonje ke lanmou BonDye depase tout bagay. Celigny Dathus chante pou rann glwa bay BonDye, rekonèt ke gras Li se sèl bagay li ka ofri an retou.
15. KENSLEY ALEXANDRE - “Ou Pa Janm Bay Manti”
Kensley Alexandre ofri nou yon nouvo videyo mizik li “Ou pa janm bay manti,” ki soti 20 septanm 2024, videyo mizil sila a, ki reyalize pa Roby Pierre, se yon louwanj ki mete aksan sou fidelite BonDye nan tout sitiyasyon nan lavi. Atis Kensley soulinye jan BonDye toujou pwoteje ak defann sila ki san defans yo, Li toujou kenbe pawòl Li san manke anyen.
Mizik sa a se yon temwayaj ki montre ke BonDye pa janm dezonore pwomès Li yo, epi Kensley envite nou pou nou kontinye mete konfyans nou nan BonDye, menm lè tout bagay parèt difisil. “Ou pa janm bay manti” se yon mizik ki ankouraje nou pou nou leve vwa nou pou chante louwanj BonDye, paske Li fidèl nan tout pawòl Li yo epi Li toujou la pou bay fòs ak lespwa.
16. FRÈ MENDY - “Tout Se Pou Ou”
Frè Mendy prezante nouvo videyo mizik li "Tout se pou ou," ki soti 25 septanm 2024. Mizik sa a, ki ekri pa Frè Mendy li menm, mete limyè sou enpòtans pou bay BonDye tout glwa nan chak reyalizasyon nou. Avèk pwodiksyon Spencer Brutus nan Tracktion Studio ak yon videyo ki reyalize pa Yvener Antoine anba lobedyans GMP Media, "Tout se pou ou" se yon apèl pou tout kwayan sonje ke kapasite ak siksè yo soti nan BonDye.
Mizik la raple nou pou nou toujou rete nan imilite epi evite kite lògey genyen plas nan kè nou. Frè Mendy itilize vwa li pou transmèt yon mesaj klè: kèlkeswa kapasite ak bèl jès moun ka fè pou nou, se BonDye kreyatè a ki merite tout louwanj ak rekonesans. Se yon mizik ki motive nou pou nou pote tout glwa bay BonDye nan chak etap nan lavi nou, menm lè li ap itilize nou pou fè bèl travay nan kominote a.
17. CASSANDRA GUILLAUME - “Not Alone”
Anba etikèt Holysongs Ministries atis Cassandra Guillaume soti nan dat 26 septanm nan yon o videyo lyrics tout nèf ki pote non “Not Alone”. Chante sa a gen ladan l yon mesaj ki plen esperans pou tout moun ki ap fè fas ak dezespwa epi solitid.
Mizik la chante ak yon pasyon ki touche nanm, pandan Cassandra asire ke lanmou BonDye pap janm febli, menm nan moman ki pi difisil yo. BonDye chèche soulaje tout moun ki santi yo pou kont yo.
Refren an, “Non, tu n’es pas seul. Je suis là, à tes côtés,” se tankou yon pou aktive konfyans nan BonDye, san kè sote. Se yon mizik ki ankouraje moun fè fas a chak defi ak kouraj, menm lè lavi parèt enkontwolab.
18. KORAL SYMPHONIE - “Padone”
Padone m se tit videyo mizik tout nèf Koral Symphonie mete 28 septanm 2024. Mizik sa a pote yon mesaj sou enpòtans padon ak lanmou nan relasyon ant frè ak sè.
Nan mizik sa a, koral Symphonie fè referans a ansèyman biblik ki enspire nou pou renmen pwochen nou menm jan ak pwòp tèt pa nou.
Mizik la raple nou ke, malgre tout blesi yo, se nan padon nou ka jwenn liberasyon ak gerizon. “Padone” se yon mizik ki enspire pou ranfòse lespri kominote a, montre kijan lanmou ak padon ka chanje lavi epi ki ankouraje tout moun pou pratike padon, menm lè li difisil.
19. KORAL DEG - “Bat Bravo”
Aprè plis pase yon lane silans koral DEG retounen avèk yon nouvo videyo mizik ki rele “Bat Bravo” nan dat 29 septanm 2024, ak yon tèks ki ekri pa Berwin SYDNEY ak yon melodi ki pote siyati Salomon LIRA (Salil). Mizik sa a se yon louwanj ki klè ak pwisan, ki envite kwayan yo felisite BonDye pou tout bèl bagay Li fè nan lavi yo.
Nan tèks la, koral la fè konnen ke tout sa yo genyen ak tout lavi yo soti nan men BonDye, epi yo rekonèt ke fòs ak talan pa yo pa sifi. Se sèlman BonDye ki merite tout glwa pou bèl travay Li fè nan lavi yo.
“Bat Bravo” se yon mizik ki ranpli ak rekonesans epi remèsiman, ki montre kijan BonDye fè gwo bagay nan lavi chak moun.
Se yon mizik ki ka motive moun pou yo toujou mete konfyans yo nan BonDye epi toujou « bat bravo » pou Li pou tout gras Li ak mirak Li fè chak jou nan lavi yo.
Palmarès Mizik/Videyo Evanjelik plis pase yon koleksyon mizik; li se yon refleksyon vivan sou devosyon ak kreyativite ki anrichi mond evanjelik la. Chak mizik yo, nan pwòp fason yo revele potansyèl atis yo, gwoup ak koral yo nan kontribye pou pataje mesaj lapè, lespwa, ak enspirasyon. Nou ankouraje w patisipe nan vwayaj sa a, sipòte travay kreyatè yo, epi pataje kreyasyon sa yo ak tout moun ki nan antouraj ou. Ansanm, nou ka fè yon diferans nan kominote nou an, pandan n ap kontinye jwi ak ankouraje bon mizik ki touche kè nou ak ranfòse lafwa nou.
Redaksyon:
Vanauscheca P. Bouzy, Blanfort Ronalson & Jonathan Dorziaire
Konsepsyon Grafik:
Jo-Flung Bouzy & Carlo Paurice
Comments