Yon lòt fwa ankò ekip Konekte M nan atravè "Palmarès Mizik/ Videyo Evanjelik" ap envite piblik la dekouvri ansanm pwodiksyon mizik ki soti nan mwa jen an e ki gen anpil valè pou mizisyen tout patou sou latè.
Pou mwa jen, nou gen 9 mizik/videyo: 5 videyo ofisyèl, ladan l nou jwenn 2 kolaborasyon, 1 videyo lyrik, ak 1 videyo adisyonèl.
Mwa jen sila a pote pou nan anpil mizik ki makonnen ak yon mesaj lespwa ak lafwa.
Ann dekouvri ansanm pi bèl mizik evanjelik ekip redaksyon an repètorye ki make mwa mizik la.
Mizik nou dekouri yo:
1
WILIADEL DENERVIL & ROSENA JOSSELIN/ - "Wont Ou Yo".
“Wont ou yo” se yon kolaborasyon ekstraòdinè ant de bèl vwa nan sektè mizikal evanjelik la, Wiliadel Denervil ak Rosena Orys Josselin. Mizik sa a, ak videyo ofisyèl li, te soti 2 jen 2024, e li pote yon eksperyans vizyèl ak sonò ki bay kè kontan ak tout moun ki renmen mizik.
A kote atis yo ki chante mizik sila, "Wont ou yo" pote siyati plizyè talan tankou Salomon Lira, Handy Beaubrun, Germano Charles, ak Milot Joseph nan pwodiksyon mizik la epi Samuel Bien Aimé ak Salomon Lira kolabore nan ekri tèks sila.
Pawòl mizik la eksprime libète ak delivrans, avèk yon mesaj klè: “wont ou yo pral fini paske lesyèl pale”. Li ankouraje kenbe lafwa pandan y ap toujou kwè nan pwoteksyon BonDye.
2
BROTHER ZOÉ - "Wa Fèl Pou Mwen".
Chantè Elysée Pierre, ki gen non Brother Zoé, lage premye single li "WAP FÈL POU MWEN" nan dat 2 jen 2024. Mizik sa a soti ak tout videyo ofisyèl. Brother Zoé te kenbe anpil moun nan atant rive pote pou tout moun yon mesaj lespwa ak lafwa.
Brother Zoé se otè ak konpozitè mizik la, pawòl yo eksprime yon konfyans nan kapasite BonDye pou fè tout kalite mirak. Chante a fèt ak istwa biblik ki montre BonDye konn chanje enpòsib yo an posib yon fason pou ankouraje chak moun k ap tande mizik sa pou yo toujou kenbe lafwa.
3
Aquela Dorvil - "Ou Etone M".
Nan dat 4 jen salmis Aquela Dorvil soti "Ou Etone M" yon mizik tout nèf ak tout videyo ofisyèl.
Tout aspè nan mizik sa a se yon manifestasyon talan ak pasyon. Pawòl, melodi, ak aranjman mizikal la soti nan men Aquela Dorvil menm.
Mizik “Ou Etone M” anbeli plizyè fraz ki deja soti nan mizik anvan yo tankou “Pale pou mwen,” “Kè m pa sote,” “Fè yon wout,” ak “Fè l pou mwen papa.” Itilizasyon fraz sa yo bay mizik la yon santiman kontinite ak raple sou ansyen mizik Aquela yo ki te deja touche plizyè kè.
“Ou Etone M” se yon temwayaj pèsonèl pou tout moun ki santi yo vle benefisye de yon mesaj ankourajman ak lafwa. Se yon mizik ki envite nou tout reflechi sou benediksyon BonDye nan lavi nou.
4
Talitha Laguerre - "Tout Sa BonDye Fè Bon".
“Tout Sa BonDye Fè Bon” se yon kreyasyon mizikal ki soti 13 jen 2024, chante pa Talitha Laguerre. Chante sa a fè lwanj pou tout bèl bagay BonDye fè nan lavi nou.
Chante a fè yon apèl pou nou kite Bondye ban nou fòm Li vle, itilize nou jan Li, epi kite Li transfòme nou jan l vle. Repetisyon fraz “Seyè konsa, jan w vle l li bon” ak “Seyè, tout sa w fè bon” mete aksan sou enpòtans travay BonDye nan tout aspè lavi nou.
“Tout Sa Bondye Fè Bon” se yon mizik ki soti ak yon videyo lirik, ki ede n plonje nan refleksyon ak meditasyon pandan n ap tande l. Mizik la ankouraje nou pou apresye ak remèsye BonDye pou tout benediksyon Li yo.
5
Ernst Plymouth - "M ap Reyisi".
"M ap Reyisi" se dènye kreyasyon mizikal Ernst Plymouth, ki soti ak tout videyo ofisyèl nan dat 16 jen 2024. Chante sa a pote yon mesaj fò sou lafwa, siksè, ak viktwa nan Jezi.
Chante a ankouraje moun pou yo kenbe lafwa epi deklare siksè yo. Li raple nou tout pawòl nou gen pouvwa sou destine nou, epi Bondye ap akonpli tout sa nou deklare ak konfyans. Fraz tankou "Mwen siyen siksè mwen" ak "M ap reyisi nan non Jezi" repete plizyè fwa pandan tout mizik la, bay yon sans detèminasyon san fay.
"M ap Reyisi" bay yon mesaj lespwa pou ane sa a malgre bagay yo parèt konplike men li se ane pou nou reyisi nan non Jezi. Pawòl mizik la montre ak lafwa nan Bondye okenn obstak pa kapab kanpe devan nou.
6
MARIELLE DONATIEN - “M ap Tann Ou”.
Marielle Donatien lanse l ak mizik tout nèf ki gen pou tit "Map Tann Ou," 18 jen 2024. Chante sa a pote yon mesaj lespwa ak enspirasyon pou tout moun ki ap tann ak konfyans yon bagay.
Pawòl mizik la pale sou pasyans ak konfyans nan pwomès Bondye. Marielle chante ak pasyon, ankouraje moun pou yo kenbe lafwa menm nan moman difisil.
"Map Tann Ou" gen yon pwofondè nan melodi dous li a ak pawòl pou nou kenbe lafwa pandan n ap tann reyalizasyon pwomès Bondye.
7
Loutchina Decius- “Domine”.
Loutchina Décius soti premye single li "Domine" aprè album "Lanmou sensè" 20 jen 2024 , mizik sa akonpaye ak yon videyo ofisyèl. Chante sa a pote yon mesaj fò pou tout moun ki ap chèche ranfòse lafwa yo ak jwenn fòs nan pwomès Bondye.
Mizik "Domine" se yon rezilta kolaborasyon ant Loutchina Décius, Mackenson Moise, Stanley Georges, ak Joe Dany Alexis. Anpil lòt moun te kontribye pou fè mizik la espesyal.
Pawòl mizik la ranpli ak referans biblik ki ankouraje moun yo pou yo rete fèm nan lafwa yo. Loutchina Décius raple tout kretyen yo ka domine tankou Jozèf, Jozye, ak Estè, ki te pat fè bèk atè devan obstak yo epi ki reyisi ekri non nan panteyon lafwa avèk èd Bondye.
Refren “M pral domine” repete avèk fòs ak enèji, Mizik la fè konnen moman difisil yo fini, e kounye a se yon sezon tou nèf pou briye ak reyisi. Pawòl tankou “Jezi pral leve m” ak “Sezon m nan rive” pote yon mesaj lafwa nan Bondye: tout bagay posib.
8
Rosalinda Esmanga & Wayne Mondélus - "Mwen Libere”.
Rosalinda Esmanga ak Way Mondélus reyalize dezyèm kolaborasyon milye a nan mwa jen, "Mwen Libere" ki soti 30 jen 2024. Chante sa a pote yon mesaj pwofon sou sakrifis Jezi sou kwa a, dezi fè volonte Bondye, ak anvi sanble ak Jezi.
"Mwen Libere" se yon apèl pou tout moun leve epi selebre libète yo jwenn nan Jezi.
9
Lutherson Cid - “Reveille Toi”.
Lutherson Cid prezante nouvo mizik li a, “Réveille-toi,” ak yon videyo ofisyèl ki soti 30 jen 2024.
Mizik sa a ankouraje moun pou yo leve espirityèlman, avèk yon referans biblik ki soti nan Éphésiens 5:14: “Réveille-toi, toi qui dors, Relève-toi d’entre les morts, Et Christ t’éclairera.”
Chak mizik pote yon mesaj espesyal ki ka touche kè moun ak ranfòse lafwa yo. Mizisyen, atis yo avèk talan eksepsyonèl yo, itilize pawòl ak melodi pou fè nou sonje pouvwa ak fidelite BonDye. Rete branche pou plis mizik ki ap soti nan mwa kap vini yo pandan n ap kontinye ankouraje atis, gwoup ak koral nou pwodui plis lè nou ap apresye travay yo sou tout platfòm mizik yo. Se ap okazyon tou pou w jwenn bon jan pwovizyon pou nanm ou. Nou swete mizik sa yo touche kè ou e yo ba ou fòs pou kontinye avanti espirityèl ou.
Redaksyon:
Jonathan Dorziaire & Vanauscheca P. Bouzy
Konsepsyon Grafik:
Carlo Paurice & Jo-Flung Bouzy
Comments