Sa fè kèk tan «Extended Play (EP)» vin yon monè kouran nan inivè mizikal milye evanjelik ayisyen a. Plizyè atis fè chwa soti yon EP pafwa menm plizyè EP nan yon sèl ane a tankou nan ka rapè frè Gabe pou sèlman ane 2024 la ofri milye evanjelik twa (3) «Extended Play».
Yon EP se yon pwojè mizikal ki gen ant 3 a 6 mizik oudimwens se yon pwojè ki ant 15 a 30 minit. Anpil moun yo konsidere «Extended Play» la kòm yon Ti albòm ( Album court/ disque prolongé).
Pandan ane 2024 sa ki sot pase a ekip Konekte M nan repètorye 8 EP nan pwodiksyon mizik evanjelik ayisyèn nan. Plizyè ladan yo chaje ak varyete mizikal tankou konpa, rap, Amapiyano elatriye. Nou remake kominote Rap gospel la pandan 2024 la, fè chwa pou akouche EP de preferans. Atravè atik sa n ap ede n pakouri 8 EP sa yo ansanm. Soti sou premye ki soti nan ane rive sou dènye a.
1- Nos yeux sont sur Toi, premye EP rap gospel pou 2024 la
Frè Vio se yon rapè evanjelik, li se youn nan dekouvèt plizyè moun ki renmen mizik evanjelik an patikilye sila ki genyen yon lanmou espesyal pou Rap Gospel la. Rapè a ofri nou yon EP ki abòde plizyè sijè tankou egzòtasyon, konba espirityèl, lafwa, konfesyon, elòj pou BonDye elatriye.
1- «Lettre aux Chrétiens» dire 3 minit 14 segond se premye mizik ki sou pwojè sila a. Frè Vio atravè yon bon flo denonse plizyè deriv ki alamòd nan kominote eklezyastik nou an. «Legliz gen plis fanatik pastè pase disip Kris»: se yon nan fraz ki ilistre denosiyasyon ak egzòtasyon frè Vio t ap fè nan «Lettre aux chrétiens»
2- «Ephesiens 6 (Kretyen nou nan gè)», se yon mizik ki dekri batay espirityèl kretyen yo ap mennen chak jou nan vi yo.
3- «Nos yeux sont sur Toi» se yon tèks ki eksprime yon konfyans san parèy nan BonDye ki konn batay la epi ki pap janm pèdi batay la.
4- «Lave m» se yon priyè pou chache padon BonDye. Se yon konfesyon ki montre feblès nou menm kòm moun k ap suiv Kris.
5- «Ou fè l vre» menm jan ak «Li leve defi» se de mizik ki fè elòj pou BonDye ki gen kapasite pou fè gwo mèvèy.
6- «Ou s'on ewo» charye yon mesaj motivasyon pou moun ki pèdi espwa. Frè Vio pwofite pou raple nou se yon EWO malgre sitiyasyon difisil n ap viv yo.
2- Konsolasyon –, Vol. 1
Frederson Joseph lage EP “Konsolasyon – Volume 1”, nan dat 16 mas 2024, yon koleksyon sèt (7) mizik ki chaje mesaj espwa, ak rekonfò pou moun k ap travèse moman difisil. EP sa a se yon melanj rafine ant mizik ki touche nanm ak mizik ki reflechi sou pwoteksyon ak fidelite Bondye.
«Konsolasyon» pote yon mesaj pou tout moun ki ap chèche rekonfò nan mitan eprèv lavi a. Chak mizik sou EP a sanble ak priyè, ki transfòme eksperyans pèsonèl an yon sous ankourajman. Frederson Joseph itilize vokal li avèk emosyon epi senserite, pandan li ofri yon melanj atiran de mizik tradisyonèl ak modèn.
EP a kòmanse avèk «Se Vre», yon deklarasyon lafwa de jan BonDye bon. Mizik «Li Posib» raple ke tout bagay posib ak BonDye, yon pyès ranpli ak enèji pozitif ak espwa.
«Manto Gras» se yon envitasyon pou reflechi sou gras BonDye, pandan «Elohim» ogmante adorasyon ak respè pou Sovè a. «Se Sèl» mete aksan sou BonDye kòm sèl sous tout rekonfò ak direksyon.
Tit ki pote non EP a, «Konsolasyon», se nan nan pwojè a, yon mizik ki touche nanm pandan li envite n jwenn rekonfò nan prezans BonDye. «Moun BonDye Beni», ki fèmen EP a, se yon deklarasyon viktwa ak rekonpans pou tout moun ki rete fidèl malgre difikilte yo.
«Konsolasyon , Volume 1» se yon eksperyans espirityèl ki adrese bezwen pou rekonfò ak lespwa. Mizik yo fèt pou ankouraje nou ranfòse lafwa nou, epi raple nou ke BonDye toujou la nan chak etap nan lavi nou.
3- Èg paka malfini (EP de l'Éternel 1.0)
Vandredi 3 me 2024 la, frè Gabe youn nan rapè evanjelik ayisyen ki pi pwolifik nan milye soti «Èg paka malfini». Yon pwojè ki gen 6 mizik ak tout videyo ki dayè ki disponib sou chanèl Youtube atis la.
1- «Pa lage m» se premye track (twak) sou EP a, se yon konfesyon ki chaje pwofondè frè Gabe fè ak BonDye. Rapè a konpare lavi kòm ak yon kadav anbilan menm anbilans paka pran. Akoz peche rapè eksprime ki jan li pèdi prezans BonDye epi ap viv moman sa yo ak yon regè.
2- «You will shine», se yon motivasyon pou ògmante lafwa tout moun k ap travèse yon moman difisil. Konpozitè a fè n konnen nou dwe ranmanse fòs ak kouraj nou pou avanse paske «Jezi pa gen travay inache nan CV L».
3- «Reyalite Mizisyen Legliz», se yon mizik ki dekri reyalite sila k ap jwe mizik pou BonDye andedan legliz yo. Yon reyalite ki sanble tèt kole ak eskplwatasyon.
4- «Ou pap konprann» se yon temwanyaj pèsonèl ki pale de kote Jezi soti ak atis la.
5- «Epa sou ou» ki se dènye mizik sou pwojè sila la se yon lòt mesaj motivasyon pou ògmante lafwa ak konfyans nou nan BonDye menm lè tout bagay sanble enposib. Videyo mizik sa rankonte istwa frè Peter ki oblije kite lakay akoz briganday bandi san l pa menm konn ki kote l prale. Mesaj sila chita sou yon rapèl de sa BonDye fè pou plizyè moun nan labib. Ki fè n konprann BonDye pa janm chanje men jan Bib la ekri nwa sou blan nan Ebre 13:8 ak Jak 1: 17
4- EP de l'Éternel 1.2
Anonse pou 8 mas 2024 men nan yon pòs Facebook Frè Gabe te anonse repò a soti pwojè a akoz sitiyasyon ensekirite ki te mangonmen nan peyi a diran peryòd sila a. De (2) mwa aprè, egzakteman 3 me 2024, men m jou li te soti «Èg paka malfini» an, Alan Pierre Gabriel deside soti «EP de l'Éternel 1.2» yon pwojè 6 mizik ak videyo. Nan mwens pase 15 jou se te deja plis pase yon milyon «plays» sou youtubemusic. Anndan pwojè sila rapè evanjelik ayisyen an te adrese mesaj li ak plizyè kategori moun nan sosyete a tankou ak ak moun anndan legliz, ak atis nan mond sekilye a (HMI). Anplis de sa frè Gabe te sible twa atis nan mond sekilye pèsonèlman: Fantòm, defi (Fantòm men Defi w), epi Wendy (Ey Wendy). Yon chwa oze ki te menm rive kreye polemik.
«Ep de l'Éternel» se yon atizay ki chita sou mesaj evanjelizasyon epi ak rekonfò. Frè Gabe montre nou yon ènyèm fwa potansyalite l pou fè mesaj Pawòl BonDye a pase nan jwe ak mo, pandan l asire yon vibe (vayb) ki kaptive moun ki renmen estil mizikal ki makonnen Rim Ak Pwezi (RAP).
1- M ap pote kwa m
2- Fantòm men Defi
3- Dènye mwason
4- HMI
5- Hey Wendy
6- Repanti Konvèti RK
5- «7 SEPT» : Dieumet Lanse Yon EP Ki Defini Yon Nouvo Kouran Mizikal.
Nan lide pou fè ou dekouvri yon pati lakay atis Dieumet, li prezante yon nouvo pwojè ki pote non «7SEPT», ki sòti nan dat 7 dawout 2024. EP sa a, ki senbolize chif pèfeksyon an (7), se yon chwa estratejik nan karyè li kòm kreyatè ak chantè, epi li sèvi kòm yon platfòm pou kontinye montre kokennchenn talan ak kapasite li nan divès tandans mizikal.
«7SEPT» se yon kreyasyon ki ofri piblik la ak endistri a yon eksperyans mizikal ke yo pat janm konnen anvan. Li reprezante yon repètwa ki fòmile nan tandans Rap sèlman, ak yon estrikti ki enkli sèt (7) tit, kote chak tit ap dire pou piti yon (1) minit.
EP a gen ladan l sèt (7) chante ki chak pote yon mesaj pwofon:
• GOAL – Yon refleksyon sou objektif ak aspirasyon.
• RESPÈ – Yon apèl pou respekte tèt nou ak lòt moun.
• RENMEN – Yon jèm ki eksprime lanmou ak afeksyon.
• KONTINYE – Yon ankourajman pou pa janm abandone rèv yo.
• DEDIKAS – Yon apresiyasyon anvè moun ki enspire ak sipòte atis la.
• ISTWAM – Yon naratif sou eksperyans ak vwayaj pèsonèl Dieumet.
• MALE – Yon eksplorasyon sou difikilte ak chagren.
«7SEPT» se yon devlopman atistik ki mete aksan sou potansyèl Dieumet kòm yon atis ki angaje. Avèk sa a, li pwouve kapasite li pou adapte l ak nouvo tandans, tout pandan l ap kenbe idantite mizikal li.
EP sa a se pou tout fanatik mizik, pou yo reponn ak yon nouvo eksperyans ki kapab chanje fason yo wè ak apresye mizik Rap la. Dieumet, atravè «7SEPT», ap fè yon enpak ki pral make istwa mizik li, pandan li kontinye angaje ak kominote a atravè yon mesaj ki enspiran ak motivan.
6- «2 Minit Tranzisyon» : Yon EP Ki siyen yon chapit tou nèf nan karyè Stanley Georges.
Aprè lansman albòm «L ap Konbat Pou Ou» nan kòmansman ane a, chantè-konpozitè Stanley Georges retounen ak yon nouvo pwojè kreyatif: EP «2 Minit Tranzisyon». Pwojè sa a, ki gen sis (6) mòso ak yon dire kout anviwon de (2) minit kelke segond, make yon chanjman estrateji nan direksyon mizikal atis la, pandan l ap swiv yon liy plis oryante vè estil ki plis modèn yo Afro, Amapiyano epi menm Konpa.
Prezantasyon ofisyèl EP a te fèt samdi 10 dawout 2024 nan OT Restoran, Delma 75. EP sa a reprezante yon efò klè pou Stanley elaji odyans li, sitou nan mitan jèn fanatik ki enterese nan ritm ak jan mizikal modèn yo.
«2 Minit Tranzisyon» sèvi kòm yon eksperyans mizikal kout men ki ka enpakte. Se yon mouvman entelijan ki pèmèt Stanley Georges aleje estrikti mizik evanjelik tradisyonèl yo pandan l ap kenbe mesaj enspire ak pwofondè espirityèl yo.
EP a mete aksan sou plizyè kolaborasyon enpòtan ak mizisyen ki deja fè bri nan endistri mizik la, ki pote enèji ak vitalite nan pwojè a.
EP a ouvè ak «Fòk Ou Renmen», yon mizik ak yon melodi angaje, ki make antre a ak yon ton pozitif.
«Istwa Lanmou» vini nan dezyèm pozisyon.
Twazyèm nan lis la se « Se Ou L Ye», yon mòso ki rapousuiv entèrogasyon sou lanmou ak lafwa.
«Bèl Nanm», yon kolaborasyon ant Stanley Georges ak Loutchina Décius, ofri yon dyalòg vokal plen emosyon, pandan «Gédéon» ankouraje ak yon mesaj enspiran ki ka bouste detèminasyon.
EP a fini ak «Rèv Mwen», yon mòso entim ki envite nan refleksyon pèsonèl sou lespwa pou lavni.
Lis Sis (6) Mòso yo nan Bon Òd:
1. Fòk Ou Renmen
2. Istwa Lanmou
3. Se Ou L’Ye
4. Bèl Nanm
5. Gédéon
6. Rèv Mwen
Disponibilite Entènasyonal
EP « 2 Minit Tranzisyon» disponib sou tout gwo platfòm dijital, tankou Spotify, Apple Music, ak Deezer, bay fanatik yo aksè fasil a kreyasyon tou nèf Stanley Georges la, kèlkeswa kote yo ye.
Yon Nouvo Etap nan Devlopman Atis la
Avèk pwojè sa a, Stanley Georges demontre kapasite l pou adapte ak inove pandan l ap kenbe idantite mizikal li. «2 Minit Tranzisyon» ofri yon moman refleksyon, koneksyon, se yon deklarasyon ki make kwasans ak evolisyon yon atis ki kontinye angaje ak mizik ki touche nanm ak lespri.
7- «Renesans» : Yon EP ki vle ofri yon dimansyon espirityèl tou nèf
Nan yon efò pou entegre mizik ak mesaj espirityèl yo, Frè Gabe ak Deborah Henristal lanse «Renesans», yon EP ki pwomèt pou pote nouvo enèji ak rekonesans nan lavi kwayan yo. EP sa a gen senk (5) mizik ak senk (5) videyo, ki fè pati yon pwojè fasone pa «Inspiration Divine Studi» ak pwodui pa «ReD Vision Plus».
«Renesans» se yon envitasyon nan yon vwayaj nanm kote mizik vin tounen yon zouti gerizon, ak renouvèlman espirityèl. Avèk yon melanj de tandans modèn ak mesaj pwofon, EP sa a envite chak moun yo nan yon moman refleksyon ak adorasyon.
1. Inosan Pap Koupab
Mizik sa a eksplore tèm inosan ak delivrans, ak yon mesaj fò sou jistis ak padon. Li dire 3 minit 55 segond.
2. Praise the LORD
Depi premye nòt yo, mizik sa a ranpli ak enèji adorasyon. Li dire 2 minit 48 segond epi montre kijan Frè Gabe ak Deborah sèvi ak mizik pou glorifye BonDye.
3. Ann Ri Enmi an
Nan 2 minit 51 segond Déborah ak Frè Gabe lanse yon apèl pou selebre viktwa malgre difikilte, mizik sa a ankouraje kwayan yo pou yo vanse avèk jwa.
4. Feeling Down
Mizik sa a trete tèm boulvès emosyonèl ak difikilte pèsonèl. Avèk yon ton sansib, li envite nou reflete sou moman difisil pandan n ap jwenn rekonfò nan lafwa.
5. Depresyon Deyò
Ak yon mesaj ranfòse kont depresyon ak negativite, mizik sa a envite moun kenbe espwa ak rejte dezespwa.
Avèk «Renesans», Frè Gabe ak Deborah Henristal demontre kapasite yo pou konbine mizik, lafwa, ak emosyon nan yon fason ki pale ak kè moun. Mizik yo pa sèlman yon eksperyans mizikal, yo pote mesaj lespwa.
Disponib sou tout gwo platfòm dijital ak akonpaye pa videyo pwofesyonèl, «Renesans», se yon pwojè ki make kwasans ak devlopman kreyatif nan karyè atis yo. Li envite tout moun ak fanatik yo pou selebre, adore, ak kwè nan pouvwa transfòmasyon Bondye a.
8- Pasyans: Manno Aristilde
Manno Aristilde ansyen manm Holysongs Ministries soti nan dat 19 oktòb yon EP ki pote non Pasyans. Pasyans gen 7 mizik pami yo 5 mizik konpa. Manno Aristilde fè pati yon minorite zuit atis solo evanjelik ayisyen ki soti yon pwojè ak tout kantite mizik konpa sa yo. Manno pwopoze yon pwojè ki reponn ak anpil egzijans mizikal: bèl aranjman, melodi ki antrenan, konpozisyon chaje mesaj ki jwenn fondman nan pawòl BonDye.
Pwodiksyon oze sa a reyini yon latriye mizisyen pwofesyonèl akoz chantè a fè chwa mete enstriman live sou majorite mizik sou EP sila a. Poutan sou sèt (7) mizik yo, Manno fè chwa fè yon sèl kolaborasyon ak yon sèl atis : frè Vio, yon rapè evanjelik ki fè pati de rapè ki san dout make pwodiksyon mizik evanjelik la pandan ane 2024 la. Konpozisyon Aristilde yo abòde divès sijè tankou konfesyon, pwovidans BonDye, Kondisyon sali a, Pasyans elatriye
«Banm pèmisyon» se premye mizik ki sou pwojè sila a. Konpozitè a adrese yon priyè konfesyon ki degaje yon vrè senserite. Manno eksprime gravite peche genyen nan lavi l, ki retire l nan Prezans BonDye epi ki rann li vilnerab, san defans. Chantè a nan 4 minit 49 segond mande BonDye pèmisyon pou apwoche pi prè L, sa ki ka evite l tonbe nan dezagreman peche.
«Ou bon pou mwen» se sèl mizik Manno gen yon kolaborasyon ak yon lòt atis. Manno ak frè Vio dekri BonDye kòm esans reyisit lavi yo. Menm jan Jezi di nan Jan 15:5 : «San Mwen Nou pap ka fè anyen». Chantè a ak rapè a makonnen vwa yo pou di BonDye li Bon pou yo paske prezans Li garanti reyisit yo
«Bye bye» se yon tèks ki pale de sanktifikasyon ki se yon eleman esansyèl pou sali tout kretyen, yon kondisyon Sine qua non (sinekwanoun) pou sove daprè Ebre 12:14. Manno dekri ak kèk pawòl byen fasil ki ka jwe sou imajinè odyans li an pou eksplike sanktifikasyon epi tou lavi tou nèf nou dwe mennen nan Jezi a daprè 2 kretyen 5:17. «Bye bye» pa sèlman gen pawòl byen fasil men li chita nan yon melodi antrenan ki fasil pou chante ki ede mesaj la rive pi byen.
«Pasyans» se tit pwojè sila a atravè mizik sila a Manno Aristilde eksprime yon konfyans sans paryè nan BonDye pandan l ap tann BonDye. Tèks Sila egzòte moun k ap koute l pou evite fè prese men tann BonDye ak lafwa. Pasyans se youn nan 9 karaktè donn Lespri a (le fruit de l'Esprit) nou jwenn nan Galata 5:22.
«Kenbe souri w» tèks sila elabore ankò sou youn nan 9 karaktè nan donn Lespri a (fruit de l'Esprit) nou jwenn nan Galat 5: 22 a ki se «kè kontan, Lajwa». Manno Aristilde raple nou kè kontan nou pa dwe depann de sitiyasyon menm jan apòt Pòl mande sa a nan 1 Tesalonisyen 5:16 la men nou dwe toujou kontan. Aristilde sèvi ak plim li epi vwa l pou egzòte n kenbe souri n sitou lè bagay yo parèt pi konplike paske dènye mo se nan men BonDye li ye.
«M aprann» se yon tèks ki konplemante «Pasyans» chantè a eksprime yon matirite nan eksperyans li ak BonDye ki fè anyen paka ebranle l.
«M ap monte» se yon mesaj ki raple n pou kontinye mache ak Jezi sou wout la malgre difikilte yo paske viktwa se pou nou li ye.
Anplis konpozisyon, aranjman mizikal, melodi ki akouche 8 atizay sila yo, EP sa yon temwanyaj rezistans Nou kòm kretyen epi ayisyen ki pa bat ba devan difikilte. Se sa ki fè li enpòtan pou nou kontinye sipòte atis, gwoup, koral ki fè gwo jefò pou antre nan estidyo pou pote pou nou pwodiksyon k ap nouri lafwa nou ak beni nanm nou.
Konekte M envite ale sipòte tout atis nan milye a, an patikilye 8 pwojè sa yo konsa n ap ankouraje tout atis evanjelik nou yo fè plis jefò nan ministè yo.
Redaksyon:
Jonathan Dorziaire & Vanauscheca Bouzy
Konsepsyon Grafik:
Jo-Flung Bouzy & Carlo Paurice
Comments