Nan vil Camberra, jodi jedi 28 novanm 2024 la, Palman Ostrali a vote yon lwa ki entèdi tout moun ki poko gen 16 lane itilize rezo sosyal tankou TikTok, Instagram, Facebook, ak X (ansyen Twitter). Lwa sa a, ki pami pi sevè nan monn nan, mande pou platfòm yo mete an plas mezi ki pou anpeche adolesan yo kreye yon kont.
Yon platfòm ki vyole lwa sa ap ekspoze tèt li a amann ki ka monte jiska 50 milyon dola ostralyen (plis pase 30 milyon ero).
Lwa a, ki jwenn sipò prensipal pati politik yo, pase nan de (2) chanm palman an san obstak. Senatè yo bay vòt final yo jedi 28 novanm nan, apre Chanm Ba a te apwouve li nan jounen mèkredi pase a. Sa vle di lwa a ap antre an aplikasyon nan kèk jou.
Premye Minis Anthony Albanese, ki dirije pati travayè a, te pouse lwa a ak anpil fòs. Nan yon moman kote eleksyon ap pwoche nan kòmansman ane 2025 lan, mezi sa a sanble jwenn gwo apwobasyon, espesyalman nan mitan paran ki enkyete sou enfliyans rezo sosyal sou pitit yo.
Sepandan, se pa tout moun ki dakò ak lwa sa. Dapre AFP, gen kèk jèn Ostralyen ki gentan ap panse kijan yo pral kontoune entèdiksyon sila a. "Sa t a biza pou n pa ka pale ak zanmi nou yo lè n lakay nou," yon jèn fè konnen.
Comments