Òganizasyon Médecins Sans Frontières (MSF) anonse yon desizyon difisil: sispansyon tout aktivite medikal li yo nan zòn metwopolitèn nan Pòtoprens. Desizyon sa a pran apre yon seri atak ak menas ki vize pèsonèl li yo. Jou ki te 11 novanm nan, de(2) pasyan te pèdi lavi yo anba men fòs lòd yo, nan lokal MSF, sa ki te lakòz ogmantasyon menas kont òganizasyon an.
Depi apre jou trajedi sa a, MSF rapòte kat (4) ensidan grav nan menm semèn nan.Jou ki te 12 novanm 2024 la, yo fè konnen kèk ajan Brigad Rechèch ak Entèvansyon (BRI), nan Polis Nasyonal Ayiti a te menase pèsonèl MSF yo. Sa ki fè, nan jou ki te 16 novanm, nan Delmas 33, yon chofè MSF te viktim agresyon vèbal soti bò ajan an sivil ki te avèti sou atak kont anbilans yo. Nan demen 17 novanm nan, yon inite SWAT te entèsepte yon anbilans òganizasyon an epi menase pou egzekite pasyan ki te andedan yo. Yon dènye ensidan te rive 18 novanm, pandan komemorasyon Batay Vètyè a, kote yon machin ki te transpòte pèsonèl MSF te entèsepte nan Carrefour Rita sou lòd yon ajan an sivil, ki te fè menm kalite menas kont medsen, pasyan, ak machin òganizasyon an.
MSF anonse, kòmanse 20 novanm, li pral sispann resevwa nouvo pasyan ak transfè nan senk (5) sant medikal li yo, nan Pòtoprens. Sepandan, pasyan ki deja entène yo ap kontinye resevwa swen. Christophe Garnier, chèf misyon MSF an Ayiti, eksplike desizyon sila nesesè pou pwoteje lavi pèsonèl, pasyan, ak itilizatè sèvis òganizasyon an. «Nou konn opere nan kondisyon difisil, men lè fòs lòd yo tounen yon menas dirèk, nou pa gen lòt chwa», li deklare.
Aktivite MSF nan zòn Grand Sid, espesyalman nan Port-à-Piment, p ap afekte anba desizyon sa a.
Desizyon MSF la soulve gwo enkyetid, sitou nan yon kapital kote sèvis sante yo deja depase kapasite yo ak anpil enkonpetans. «Nan yon sitiyasyon konplike konsa, enpak yo sou sante ak lavi moun yo inevitab», Garnier ajoute.
Kriz sekirite k ap sakaje Pòtoprens la kontinye mete limyè sou difikilte oganizasyon imanitè yo ap fè fas pandan y ap eseye sèvi popilasyon an. Sispansyon sèvis MSF la se yon lòt chòk pou yon peyi ki deja ap fè fas ak anpil gwo defi.
Kommentare