Vandredi 16 dawout 2024 la, nan otèl Ritz Kinam ki twouve l nan Petyonvil, Miss World Ayiti te prezante uit (8) finalis ki pral rantre nan konpetisyon pou pote tit sila k ap gen pou reprezante Ayiti pou ane 2024 la. Final la ap fèt nan dat 31 dawout 2024 la, kote y ap chwazi youn nan finalis yo pou reprezante Ayiti nan 72e edisyon Miss World k ap gen pou dewoule an fevriye 2025.
Finalis yo se: Laury Jeanlus, Djamine Ange Barthélémy, Cathie Charles, Lovely Bazile, Camesuze Joseph, Christie Guirand, Achaïna Saint-Vil, ak Saïka Cadet.
Anedie Azael Doura, ansyen Miss Univers Haïti a ak òganizatris konkou sila a, te eksprime enpòtans patisipasyon Ayiti nan konkou entènasyonal sa a. Doura te mete aksan sou kijan Miss World Haiti se yon platfòm kle pou amelyore viziblite peyi a sou sèn mondyal la, malgre defi yo.
"Nou konprann peyi a ap fè fas ak anpil defi, men li enpòtan pou nou kontinye mete Ayiti an valè. Miss World Haiti se yon fason pou montre mond lan bèlte ak potansyèl peyi a," se te deklarasyon Doura pandan konferans pou laprès la.
Konkou Miss World, ki te kreye an 1951 nan Wayòm Ini, se yon evènman entènasyonal ki selebre bèlte ak divèsite, epi ki ofri Ayiti yon opòtinite pou ogmante viziblite ak fè tout moun konnen richès kiltirèl peyi a.
Comments