Ministè Anviwònman Ayiti (MDE) ap reprezante peyi a nan COP16, Konvansyon Nasyonzini sou Lit kont Dezètifikasyon (CNULCD), ki pral fèt soti 2 pou rive 13 desanm 2024 nan Riyad, Arabi Sawoudit. Evènman sa a, ki gen gwo enpòtans, ap pèmèt Ayiti prezante defi anviwònmantal li yo, tankou degradasyon tè ak deforestasyon...
CNULCD, ki te adopte nan Somè Latè an 1992, vize rive nan "Netralite nan degradasyon tè" (LDN) anvan ane 2030. Pou Ayiti, patisipasyon nan konferans sa a se yon chans pou mobilize resous entènasyonal pou ede ak jere tè yo epi restore ekosistèm ki deteryore yo. Otorite Peyi a vle tou devlope nouvo estrateji pou fè fas ak konsekans chanjman klimatik yo, ki fè li vin plis frajil.
Ministè a pral mete aksan sou twa (3) gwo priyorite pandan COP16:
1) Mobilizasyon resous: Mande plis asistans entènasyonal epi pwopoze kreyasyon yon fon mondyal espesyalize nan lit kont dezèfikasyon.
2) Ranfòsman gouvènans: Defann yon pi bon reprezantasyon pou peyi ki pi vilnerab yo nan desizyon entènasyonal yo.
3) Kreye sinèji: Amelyore lyen ant objektif Rio yo (jere tè, pwoteje biyodivèsite, epi konbat chanjman klimatik) pou ogmante efikasite aksyon yo epi adapte solisyon yo ak bezwen peyi an devlopman yo.
Patisipasyon Ayiti nan COP16 montre angajman peyi a nan lit global kont degradasyon tè, pandan li ap chèche amelyore rezilyans ak soutenabilite li. Konferans sa a pral sèvi kòm yon espas kote Ayiti ka mete defi ak bezwen li yo nan sant diskisyon mondyal yo, pandan l ap chèche ranfòse koperasyon entènasyonal la pou yon avni miyò.
Comments