Ayè jedi 3 dawout la, yon masak te deklannche nan komin Pont Sondé a, nan Latibonit, kote plis pase 60 moun tonbe anba bal bandi ki soti nan zòn Savyen. Atak sa a, ki te vize popilasyon sivil la, soulve yon gwo dezolasyon ak laperèz nan mitan kominote a.
Dapre enfòmasyon Radio Télé Métronome te resevwa nan men komisè gouvènman St-Marc la, ant 54 ak 65 moun mouri pandan masak sa a, men li toujou difisil pou konfime kantite egzak viktim yo. Anpil fanmi deside antere kadav yo san jij de pè, yon bagay ki montre nesesite pou leta tabli sekirite nan komin sila a, menm jan ak plizyè lòt komin ankò, kote leta pèdi kontwòl yo.
Fòs lòd yo deja deplwaye nan zòn nan, men atak sa a kite yon gwo tras malouk sou popilasyon an, ki oblije kouri kite kay yo pou chape anba vyolans. Sitiyasyon sa a, yon lòt fwa ankò, montre bezwen ijans pou ranfòse sekirite an Ayiti, kote ensekirite a ap ogmante malgre entèvansyon.
Comments