Nan yon nòt pou laprès ki sòti 28 novanm 2024 la, Mairie Delmas lanse yon avètisman klè bay pwopriyetè ak administratè bwat lannuit ak klèb yo. Otorite yo mande pou tout moun respekte règ ak lwa ki an plas yo, pou asire lòd, sekirite, ak yon bon fonksyònman nan sektè sa a.
Pou ka kontinye opere legalman, pwopriyetè yo dwe pwouve ke yo gen:
1) Yon patant ki aktyèl;
2) Yon resi taks CFPB ki ajou pou ane ankou a;
3) Yon vignèt afichaj obligatwa.
Menm jan an tou, yo dwe suiv règ ki egzije:
1) Respekte orè ouvèti ak fèmen ki tabli pou pwoteje lòd piblik;
2) Pa bloke wout piblik yo;
3) Redui bri ak lòt kalite deranjman;
4) Kenbe espas yo nan bon kondisyon sanitè;
5) Asire sekirite nan lokal yo.
Mairie Delmas fè konnen nenpòt vyolasyon ap mennen nan sanksyon serye, dapre atik 398-8, 399-5, ak 401 nan Kòd Penal Ayisyen an. Sa ka rive jiska fèmen bwat lannuit oswa klèb la pou pwoteje lòd ak lapè nan kominote a. Mairie a, atravè Direksyon Afè Sosyal ak Kiltirèl li, ap travay pou kreye yon anviwònman ki an sekirite pou tout moun. Yon fwa ankò, li envite tout moun respekte dispozisyon sa yo pou byen kominote a.
Se avèk responsablite Mairie Delmas ap kontinye goumen pou asire tout espas amizman yo konfòm ak atant piblik la.
Comentários