Lè Nasyonal Ayiti a Ap Chanje Dimanch k ap 3 Novanm 2024.

Nan yon nòt ki pibliye, Sekretarya Jeneral Prezidans lan fè konnen lè nasyonal Ayiti ap rekile pou yon èdtan. Chanjman sa a ap fèt 2 zè nan maten, dimanch 3 novanm 2024.

Sa vle di, si ou gen 2 zè nan maten, ou pral reyalize l ap vin 1 nè nan maten. Chanjman sa a fèt dapre yon règ ki tabli nan mwa mas 2022.

Nan nòt la, Sekretarya a raple tout ajan ki nan fonksyon piblik, sektè prive, ak tout moun nan popilasyon an sou sa. Madam Marie Régine E. Haddad, ki siyen nòt la, di sa se pou adapte aktivite yo ak chanjman sezon an, ki se sezon ivè a.

Kidonk, tout moun bezwen sonje sa, konsa y ap ka ajiste orè yo kòmsadwa.