Nan lari Pòtoprens, istwa Leyla ak Leyna fè eko sou reyalite trajik anpil timoun ak fanm ap viv, pandan atak gwoup ak zam yo. De (2) tibebe inosan ki fèk gen yon mwa sèlman, ap sibi konsekans yon kriz san parèy. Ayè jedi 14 novanm manman jimèl yo, oblije kite kay li nan Solino pou chape anba zak vyolans gang Viv ansanm. Paran yo kouri al pran refij nan lokal Ofis pwoteksyon Sitwayen (OPC) san manje, san dlo, ak san yon kote konfòtab pou mete tilèzanj yo dòmi. Lari a, ki t a dwe yon pasaj, tounen yon chanm anba seren lapli pou yon fanmi ki pa t merite sa.
Zak gang ki sakaje Solino yo fòse fanmi sa a viv yon lavi nan ensekirite konplè. Kout zegui lavi yo senp: eseye siviv chak jou. Leyla ak Leyna reprezante plis pase de (2) tibebe marasa; yo se figi yon jenerasyon ki twouve l nan yon sikonstans yo pa te kreye, men ki blije ap peye konsekans move chwa ak ensousyans otorite isit.
Men lespwa pa mouri. Yon apèl ijans lanse pou tout moun, ki gen kè, ki jije sa enpòtan pou sove lavi yo. Manman ti marasa yo bezwen founiti esansyèl tankou manje, dlo, ak swen, ansanm ak lojman tanporè ki ka ede yo reprann fòs pandan moman difisil sa a.
📞 Si ou vle ede yo: Tanpri kontakte Nadine Telesma nan +509 3697-6917. Nenpòt jès, kèlkeswa valè li, ka fè yon diferans nan lavi Leyla, Leyna, ak manman yo.
Pa kite istwa sa pase san reyaksyon. Ansanm, nou kapab kreye yon lespwa pou de (2) inosan sila yo, nan yon sosyete k mangonmen ak dezespwa.
Comments