Kriz migratwa: Prezidant Onndiras la, Xiomara Castro, menase fèmen baz militè ameriken nan peyi sila.

Prezidant Onndiras la, Xiomara Castro, lanse yon avètisman bay peyi Etazini pandan l t ap adrese yon mesaj bay pèp ondiryen an. Li anonse gouvènman li an ka fèmen baz militè ameriken ki sou teritwa Onndiras la, an repons ak plan prezidan eli Donald Trump pou depòte an mas imigran ki nan sitiyasyon iregilye depi 20 janvye 2025.

«Si nou kontinye ap fè fas ak yon atitid agresiv kont konpatriyòt nou yo, li nesesè pou nou evalye ankò relasyon nou ak Etazini, sitou nan domèn militè. Baz sa yo, ki egziste depi plizyè dizèn lane san okenn konpansasyon finansye, pa t a dwe rete nan peyi nou ankò » se deklarasyon Prezidant Castro pandan li denonse yon enjisitis istorik ak mande yon revizyon nan relasyon ant de (2) peyi yo.

Palmerola, se baz militè ameriken ki pi enpòtan nan Onndiras, te konstui nan lane 1980 yo pou konbat mouvman kominis nan Amerik Latin. Baz sa a reprezante yon senbòl alyans estratejik ant Washington (Wachinton) ak Tegucigalpa (Tegisilgalpa). Men, relasyon sa a ka deteryore si plan ekspilsyon Trump anonse yo vini yon reyalite.

Malgre sa, Prezidant Castro fè konnen li espere yon chanjman tonalite bò kote fiti administrasyon prezidan Trump pral dirije a. «Nou swete administrasyon tou nèf la  pral louvri dyalòg ak evite reprezay ki pa nesesè kont migran Onndiryen yo, ki an jeneral fè yon kontribisyon enpòtan nan ekonomi ameriken an.» li te deklare.

Anviwon 2 milyon Onndiryen ap viv Ozetazini, kote anpil ladan yo nan sitiyasyon kote yo pa regilye. Chak ane, transfè lajan dyaspora a reprezante plis pase 25% PIB Onndiras. Yon ekspilsyon masiv t a gen konsekans ekonomik devastatè. Tony García, vis minis zafè etranjè a, konfime 250 000 Onndiryen sou lis ekspilsyon yo. "Nou pa prepare pou resevwa yon vag ekspilsyon konsa ; sa t a kreye yon defi imanitè ak ekonomik san parèy," li te di.

Menm lè li menase fèmen baz militè yo, gouvènman Onndiryen an parèt ap teste kapasite Washington pou louvri yon dyalòg. Tonalite Prezidant Castro montre relasyon ant de (2) peyi yo ka antre nan yon lòt etap ki debouche sou tansyon. Rete pou nou wè si avètisman sa  ap debouche sou yon chanjman nan politik migratwa ameriken oswa sou yon reyalite gwo ponyèt diplomatik nan kòmansman administrasyon Trump lan.