Samdi 4 janvye 2025 lan, sèt (7) kamyon konpayi SÉJOURNÉ te detounen nan komin Site Solèy. Evènman sa mete konpayi an nan gwo difikilte, kote responsab yo menase fèmen pòt yo definitivman si otorite yo pa pran mezi pou retabli lòd ak sekirite.
Daprè enfòmasyon ki disponib, bandi ki dèyè zak la mande gwo lajan ranson pou retounen kamyon yo. Men, konpayi an te deja bay yon kantite lajan ki pa divilge bay sivil ame nan zòn nan pou fè kamyon yo pase an sekirite. Sitiyasyon sa montre kijan gang yo ap pran kontwòl nan yon peyi kote leta parèt fèb.
Ensekirite a, k ap vale teren chak jou pi plis, ap anpeche fonksyònman nòmal antrepriz prive yo. Sitiyasyon sa fè anpil envestisè, kit se etranje oswa lokal, ezite envesti lajan yo nan peyi a. Kòm rezilta, chomaj la ap monte plis chak jou.
Si konpayi SÉJOURNÉ S.A t a fèmen, konsekans yo ap grav pou konsomatè yo, ki p ap ka jwenn pwodui konpayi an ofri yo, epi pou leta ki pral pèdi resous fiskal enpòtan.
Zak detounman kamyon yo vin tounen yon pratik ki regilye nan mitan gang yo, ki itilize lajan ak resous yo vòlè pou kenbe egzistans yo nan yon sistèm ki kraze brize.
Comments