Depi samdi 14 septanm 2024 la, Ayiti ap fè fas ak yon gwo pwoblèm nan sèvis entènèt ki afekte rezo Digicel la. Pwoblèm nan te kòmanse nan samdi depi 8è nan maten, jiska kounye a li kontinye ap touche anpil itilizatè atravè peyi a.
Jean Philippe Brun, direktè jeneral Digicel la, eksplike pwoblèm nan sòti nan yon kab anba lanmè ki te domaje nan zòn otèl Kaliko.
Kab sa a, ki esansyèl pou enfrastrikti Digicel, konekte Ayiti ak Etazini. Li fè konnen reparasyon yo pa posib paske pwopriyetè otèl la, Emmanuel Fritz Paret, refize bay aksè pou teknisyen yo antre ak fè reparasyon yo.
Konfli sila a gen rasin nan yon litij finansye ki egziste depi 2019, kote Digicel dwe plis pase 2.5 milyon dola vèt pou itilizasyon yon kabe fib optik ki pase sou pwopriyete Kaliko Beach. Emmanuel Fritz Paret, pwopriyetè otèl la, deklare li p ap pèmèt reparasyon yo fèt jiskaske Digicel peye lajan yo dwe li.
Sitiyasyon sa a lakòz anpil itilizatè Digicel yo nan Ayiti pa gen aksè a entènèt, e yo ap tann yon solisyon pou pwoblèm sa a ki sanble ap dire.
Comments