Pak se yon jou fèt kretyen ki komemore rezirèksyon Jezikri, men orijin li remonte nan pratik jwif yo depi byen lontan. Daprè tradisyon jwif yo, Pak (oswa Pesach) te konn selebre pou komemore liberasyon Izrayelit yo anba esklavaj nan peyi Lejip.
Bib la pale de fèt Pak la plizyè fwa, sitou nan Ansyen Testaman an. Nan Egzòd 12, Bondye bay Izrayelit yo enstriksyon pou premye Pak la.
Yo te dwe sakrifye yon ti mouton san ankenn defo ak maladi epi yo te mete san li sou poto ak sou lento pòt yo. Jou lannwit sa a, Seyè a te pase nan peyi Lejip la, li frape tout premye pitit gason yo, men li te sove kay kote ki te gen san sou pòt yo. Yo te etabli fèt Pak la pou komemore evènman sa a.
Levitik chapit 23 vèsè 5-8: Nan pasaj sa a, Bondye bay enstriksyon detaye sou fason pou selebre fèt Pak la; nan sware 14zyèm jou nan premye mwa a (Nizan) nan kalandriye ebre a, Izrayelit yo te dwe sakrifye yon ti mouton oswa jenn kabrit epi yo manje vyann li ak pen san ledven ak remèd fèy anmè. Fèt sa a te dwe dire sèt jou e yo te konsidere kòm yon fèt ki sen.
Nan Nouvo Testaman an, nan liv Matye chapit 26 vèsè 17 pou rive nan vèsè 30 lan Bib la rakonte nou Kòman Jezi ak disip li yo te selebre fèt Pak la ansanm avan li te kloure sou kwa a.
"Jezi pran pen ak diven, li beni yo, li kase yo, li bay disip li yo, li di: "Sa a se kò mwen" ak "Sa a se san mwen, ki koule pou nou".
Selebrasyon sa a rele Dènye Soupe oswa Dènye Soupe Jezi.
Jezi te kloure sou kwa e li te mouri pandan fèt Pak jwif yo. 3 jou aprè li te resisite, sa ki konsidere kòm prèv pouvwa diven li ak pwomès la nan lavi etènèl pou kwayan yo.
Se poutèt sa, Pak kretyen an asosye ak rezirèksyon Jezi Kris la, ki konsidere kòm pi gwo fèt, nan lafwa kretyen yo atravè mond lan.
Pandan plizyè syèk, jou fèt Pak la genyen tradisyon espesifik ak koutim nan diferan kilti ak rejyon nan mond lan. Koutim sa yo enkli dekorasyon ze, lachas ze Pak, prepare manje tradisyonèl ak ale nan sèvis legliz espesyal.
An Ayiti, fèt Pak la anjeneral selebre ak sèvis relijye espesyal, tankou mès Semèn Sent, lavman pye, kominyon fratènèl, teyat ki rakonte istwa lavi Jezi. Se moman tou moun manje pwason sitou vrandredi sen epi nan dimanch Pak jou rezireksyon an, anpil fanmi konn reyini ansanm pou manje epi selebre gran jou sa aprè mès. San nou pap bliye tradisyon moute kap ki konn Kòmanse kèk semèn avan semèn paskal la pou fini dimanch Pak.
Fèt Pak la selebre daprè kalandriye linè jwif yo epi anjeneral tonbe nan mwa mas oswa avril.
Comments