Kevenot Dorvil pran Tèt PNCS pou yon etap tounèf pou Batay kont Ensekirite Alimantè.

Lendi 11 novanm 2024 la, Kevenot Dorvil ofisyèlman enstale kòm Kòdonatè Jeneral Pwogram Nasyonal Kantin Lekòl (PNCS) la, nan yon seremoni ki te dewoule sou direksyon Minis Edikasyon Nasyonal ak Fòmasyon Pwofesyonèl la, Pwofesè Antoine Augustin. Pandan diskou li, Me Dorvil te remèsye gouvènman an pou konfyans li, epi deklare detèminasyon l pou bay bon jan rezilta nan tèt pwogram nan, li konsidere l kòm yon zouti kle nan batay kont ensekirite alimantè nan lekòl yo.

Me Dorvil mete aksan sou nesesite yon jesyon rijid ak transparan pou fè pwogram nan dire epi pou li gen yon enpak pozitif sou lavi elèv yo. Li deklare objektif li se asire chak timoun gen aksè ak bon kalte manje pandan yo lekòl la, sa k ap ede yo devlope pi byen epi amelyore kondisyon aprantisaj yo.

Pou Minis Antoine Augustin, enstalasyon nouvo kòdonatè a make "yon nouvo epòk pou manje lekòl an Ayiti." Li eksplike enpòtans ofri chak elèv, kit li nan lekòl piblik oswa prive, yon repa cho chak jou. Minis la fè konnen sa ap bay timoun yo plis fòs pou aprann epi soutni siksè akademik yo.

Yon lòt aspè enpòtan nan vizyon Pwofesè Augustin se ankourajman pou itilize pwodwi lokal nan kantin lekòl yo. Li te eksplike lè pwogram nan itilize pwodui kiltivatè ayisyen yo, sa bay plis benefis: li amelyore kalite nitrisyon repa yo pandan l ap soutni pwodiksyon agrikòl peyi a epi ranfòse ekonomi an. "Li enpòtan anpil pou pwodui nou yo soti nan jaden nou yo pou n nouri timoun nou yo," Minis la te di.

Avèk enstalasyon Me Dorvil nan tèt PNCS, gouvènman ayisyen an espere reyalize yon veritab transfòmasyon nan fason kantin lekòl yo jere, pou asire ke tout elèv jwenn manje ki bon pou sante, aksesib ak nitritif.