Yè vandredi 8 Novanm 2024 la, nan eta Texas, Yon jij federal nan Texas, Campbell Barker, te sispann pwogram « Keeping Families Together » la, yon inisyativ ki te bay imigran san papye yo opòtinite pou regilarize sitiyasyon yo Ozetazini. Pwogram sa a te kreye anba administrasyon Joe Biden nan, pou pèmèt moun ki rantre ilegal men ki viv nan peyi a depi dizan epi ki marye ak yon sitwayen ameriken jwenn rezidans pèmanan, e menm lanse pwosesis pou vin sitwayen ameriken.
Desizyon jij Barker reponn yon plent 16 eta Repibliken te fè, kote yo te opoze pwogram nan sou baz li t a vyole lwa federal sou imigrasyon. Selon jij la, pwogram sa a "kontrè ak prensip strik" lwa imigrasyon Etazini an, ki mande pou gen limit klè sou ki moun ki ka antre epi rete sou tè ameriken an. Kòm rezilta, li bay lòd pou sispann pwogram nan imedyatman, sa ki reprezante yon gwo viktwa pou eta ki opoze yon politik imigrasyon yo konsidere kòm twò toleran.
Pwogram nan te pote lespwa pou plizyè milye fanmi imigran ki t ap chache estabilite ak sekirite. Benefisyè yo, ki te ka antre nan pwosesis natiralizasyon apre yo fin jwenn rezidans, te wè pwogram sa a kòm yon mwayen pou kenbe fanmi yo ini ak mete fen nan ensekirite ki toujou menase yo. Sepandan, anpil Repibliken ak gwoup defans imigrasyon te kritike dispozisyon sa yo, konsidere yo kòm yon ankourajman pou migrasyon ilegal.
Desizyon sa a mete anpil fanmi nan yon sitiyasyon difisil, e li kreye enkyetid pou moun k ap chèche yon avni miyò Ozetazini. Si sispansyon an konfime nan apèl, pwogram sa a ka fini nèt, kite plizyè milye fanmi san okenn opsyon legal pou reyini.
Hozzászólások