Pòtoprens ak zòn ki toupre l yo leve anba yon anbyans chaje ak tansyon nan maten lendi 11 novanm sa a. Kout bal zam lou te tanmen tire nan diferan katye, espesyalman nan Delmas, Pétion-Ville ak Tabarre, pandan gwoup gang «Viv Ansanm » yo kontinye ap simen latwoublay ak panik.
Nan Delmas, manm gang sa yo ki gen zam lou t ap fè anpil ravaj anba Delmas ak sou wout ayewopò a. Fòs lapolis, ak plizyè machin blennde eseye reprann kontwòl sitiyasyon an pandan echanj gwo kout bal yo t ap fèt ant lapolis ak bandi yo. Daprè rapò lokal yo, anpil rezidan, espesyalman nan zòn ki toupre Ayewopò, kouri kite kay yo, pandan moun blese ak bal dapre sa yo rapòte nan Carrefour Drouillard, tou pre SONAPI.
Pandan kapital la ap fè fas ak ensekirite sa a, pèsòn pa konnen kisa k ap tann yo nan jou k ap vini yo. Gwoup gang «Viv Ansanm» te deja menase pou yo pran lari a nan plizyè videyo ki difize sou entènèt la, kote yo di yo pral simaye latwoublay nan tout vil la pou montre dezakò yo ak move gouvènans lan epi kriz politik k ap peze sou do peyi a. Nan videyo sa yo, yo kritike gwo otorite leta ki, daprè yo, ap pwofite sitiyasyon an, pandan mas pèp la ap soufri.
Nan kontèks sa a, plizyè lekòl tankou Saint-Louis de Gonzague ak Kolèj Canado te voye nòt bay paran elèv yo, fè konnen lekòl la ap rete fèmen akoz menas ak risk yo. Yo rekòmande pou elèv yo rete lakay yo pou sekirite yo pandan peryòd egzamen sa a.
Pou rasire popilasyon an, Polis Nasyonal Ayiti fè konnen, atravè pòtpawòl adjwen li, Lionel Lazarre, plizyè patwouy ap pran pozisyon nan vil la pou palye kriz la. Enkyetid ak ensekirite sa yo rive yon sèl jou apre yo fin nonmen Alix Didier Fils-Aimé kòm nouvo Premye Minis pou ranplase Garry Conille, yon chanjman politik ki sanble tou ap mete plis tansyon nan vil la.
Comments