Deba prezidansyèl Etazini an, ki te dewoule 10 septanm 2024 la, te mete fasafas Kamala Harris ak Donald Trump nan yon echanj chofe kote yo te prezante de (2) vizyon diferan pou Amerik la. De (2) mwa anvan eleksyon an, deba sa a te konsidere kòm yon moman desizif pou tou de (2) kandida yo, ak yon gwo enpak sou kous elektoral la.
Kamala Harris, ki te pi aktif nan echanj lan, te poze defi pou yon dezyèm deba, alòske li kritike pèfòmans Donald Trump. Nan yon deklarasyon pou laprès, ekip Harris la te ekri: “Vis Prezidan an pare pou yon dezyèm deba. Èske Donald Trump pare tou?” Nan menm moman an, Trump, ki te patisipe nan setyèm (7e) deba prezidansyèl li, te asire se te pi bon deba li jiskaprezan, malgre li te akize moderatè yo te an favè Harris.
Pandan deba a, Harris te klèman mete presyon sou Trump, souliye pwoblèm li yo, epi fè l sonje li kouri kont li menm, pa kont Prezidan Joe Biden. Nan plizyè fwa, Harris te atake Trump sou deklarasyon li te fè sou imigran, mete aksan sou enfòmasyon fo ki te parèt sou imigran ki "manje kana ak chat" nan Ohio, yon deklarasyon ki te demanti pa otorite yo.
An menm tan, Harris te avèti Vladimir Putin "t ap pran avantaj" sou Trump epi li t ap gen plis pouvwa si Trump te toujou nan Mezon Blanch lan. Li te mete aksan sou enpòtans repouse enfliyans diktatè etranje, souke Trump pou pozisyon li sou Izrayèl ak zanmi li yo nan Larisi.
Malgre defi Harris pou yon dezyèm deba, pa gen okenn lòt deba ki pwograme pou kounye a, men deba sa a rete yon moman enpòtan kote de kandida yo ap eseye rale plis sipò elektè Ameriken yo pou eleksyon Novanm k ap vini an.
Comments