Premye Minis Kanadyen an, Justin Trudeau, fè yon deklarasyon istorik nan maten lendi 6 janvye 2025, kote li anonse demisyon li kòm chèf Pati Liberal la ak kòm Premye Minis Kanada. Desizyon sa a vini apre prèske dis (10) lane nan tèt peyi a, yon dizèn lane ki te make pa gwo defi politik ak kritik k ap ogmante kont lidèchip li.
Trudeau ap kontinye dirije gouvènman an jiskaske Pati Liberal la chwazi yon nouvo lidè, pou asire yon tranzisyon san pwoblèm. Pami kandida potansyèl pou ranplase li yo, nou jwenn tankou Chrystia Freeland, Dominic LeBlanc, ak Mark Carney ki deja sou tab la. Dapre kèk sous politik, li sispann travay palman an jiska 24 mas, pou bay tan pou pwosesis lidèchip la fèt jan sa dwe fèt.
Dènye mwa yo te difisil pou Trudeau, ki te pèdi sipò anpil bò kote pati li a. Minis Finans lan, Chrystia Freeland, te demisyone, sa ki te febli gouvènman an plis. Nan menm tan, opozisyon an, ak lidè Pati Konsèvatè a, Pierre Poilievre, te kontinye monte nan sondaj yo. Plis presyon te vini toujou sou Trudeau nan moman sa yo akòz gwo defi ekonomik, tankou yon potansyèl batay komèsyal ak Etazini, sou administrasyon Donald Trump.
Demisyon sa a pa sèlman make fen yon epòk politik pou Trudeau, men li ouvè pòt pou yon nouvèl direksyon politik nan Kanada. Pati Liberal la ap diskite sou posiblite pou t a fè eleksyon san pran tan pou estabilize pozisyon yo sou plan nasyonal ak entènasyonal.
Justin Trudeau kite dèyè yon eritaj ki mele ant reyalizasyon enpòtan ak kritik fèm sou lidèchip li, espesyalman nan moman difisil. Peyi Kanada ap suiv ak anpil atansyon etap kap vini yo pandan li prepare pou antre nan yon nouvèl faz nan listwa politik li.
Comments