Prezidan Joe Biden anonse madi 4 jen 2024 la li pral limite aksè sou fwontyè ant Etazini ak Meksik pou anpeche migran k ap travèse ilegalman pou mande azil yo. Mezon Blanch lan te fè anons la, e li te esplike mezi sa a ap antre an aplikasyon imedyatman pou kontwole kantite migran yo.
Daprè kominike ofisyèl la, mezi tout nèf sa yo pral kontwole kantite migran k ap rive sou fwontyè a chak jou pou pa depase 2 500. Si kantite travèse ilegal yo kontinye ogmante, otorite yo pral fèmen aksè sou fwontyè a pou yon peryòd de 2 semèn. Objektif la se rive diminye kantite migran yo a pi piti 1500 pa jou.
Nan yon konferans pou laprès, Prezidan Biden deklare: "Nou dwe sekirize fwontyè nou an.
Mezi tou nèf sa yo pral ede nou anpeche migran k ap travèse ilegalman pou yo pa jwenn azil nan peyi nou an."
Administrasyon Biden lan fè konnen ap gen eksepsyon pou timoun ki pou kont yo, moun ki fè fas ak menas sante oswa sekirite grav. "Migran ki pa swiv nouvo pwosedi yo ap riske depòtasyon nan peyi orijin yo oswa voye tounen nan Meksik": deklarasyon yon responsab administrasyon an te ajoute.
Prezidan Biden ankouraje migran yo pou itilize platfòm CBP One pou pran randevou olye yo travèse fwontyè a ilegalman.
Mezi sa yo vini nan yon moman sansib anvan eleksyon prezidansyèl novanm 2024 la. Biden ap fè fas ak ansyen Prezidan Donald Trump, ki deja pwomèt l ap sakaje migran si li rive prezidan pou yon dezyèm fwa.
Mezi fewòs sa yo montre detèminasyon administrasyon Biden pou sekirize fwontyè a pandan peryòd pre-eleksyon an. Biden espere règ tout nèf sa yo ap ede diminye kantite migran k ap eseye antre ilegalman nan peyi a.
Commentaires