Jwèt Olenmpik yo ki fè gwo ouvèti ofisyèl li vandredi 26 jiyè 2024 la na vil Pari kapital Lafrans deja kreye plizyè polemik: desizyon abit match Ajantin kont Marok la, reprezantasyon tablo disip yo ak Jezi anplis de sa a gè Izrayèl Palestin jwenn kote pou fofile kò l.
"Se pa yon kesyon koutwazi ak jantiyès, men se yon prensip. Mwen pa antann bay okenn moun nan delegasyon Izrayèl lamen si sèlman yo ta rekonèt peyi Palestin kòm yon Leta ki granmoun tèt li" se deklarasyon Mesye Jibril Rajoub, Prezidan komite Nasyonal Olenpik Palestin bay jounalis Guardian ayè samdi 27 jiyè a.
Prezidan komite Nasyonal Olenpik Palestin nan te estomake pou wè youn nan moun ki pote drapo Izrayèl la jidoka Peter Paltchick soutni piblikman peyi l k ap bonbade palestinyen yo nan Gaza a. Atlèt juif la te pibliye sou rezo sosyal yo plizyè foto misil lame Izrayèl la ak yon kòmante "De mwen ak nou se yon plezi". Mesye Jibril Rajoub kontinye pou l di "Al mande prezidan komite Olenpik Izrayèl la, ki jan l fè ap ankouraje sòlda peyi l yo, ki jan chanpyon jido l la fè ap sipòte gè a. Pa poze viktim nan kesyon, al mande kriminèl yo".
Depi 7 oktòb moun pa sispann moun nan lagè sa a plis pase 39 258 moun deja pèdi lavi yo nan Gaza selon bilan Ministè Sante Hamas pou vandredi 26 jiyè, san konte plizyè lòt ki blese ak sa ki oblije ap viv tankou refijye.
Comentarios