Jij enstriktè Benjamin Felismé voye yon manda konparisyon bay 3 konseye Prezidan ki gen non yo site nan eskandal BNC a.

Jij Benjamin Felismé k ap trete dosye eskandal koripsyon nan BNC a, ki enplike 3 nan manm Konsèy Prezidansyèl Tranzisyon yo,  mete yon manda konparisyon kont 4 moun ki  gen non yo site nan dosye sila, pami yo 3 manm KPT a. Jij Felismé ap tann konseye prezidan Louis Gérard Gilles, Emmanuel Vertilaire ak Smith Augustin dwe reponn prezan devan jij la 9, 10 ak 11 desanm k ap vini la.

Ansyen prezidan BNC a Raoul Pierre-Louis akize  twa Konseye prezidan kòmkwa, yo ta fè l chantaj pou l te ka toujou rete nan tèt Bank Nasyonal Kredi peyi a. Mesye Pierre-Louis lonje dwèt sou 3 manm KPT sa yo, li fè konnen yo egzije l pou l te ba yo 100 milyon goud.

Lòt chapit nan dosye eskandal koripsyon BNC a vini aprè ULCC te remèt rapò yo bay lajistis peyi pou fè limyè sou dosye sila. N ap raple twa Konseye prezidan yo kontinye di yo inosan nan dosye a.