JetBlue pwolonje sispansyon vòl li yo pou direksyon Ayiti.

Konpayi avyon ameriken JetBlue anonse li pral pwolonje sispansyon vòl li yo ant Ayiti ak Etazini jiska 30 avril 2025. Desizyon sa a vini apre yon ensidan nan mwa novanm, kote yon avyon konpayi an te sibi domaj anba bal pandan yon vòl komèsyal.

Dapre enfòmasyon yo, sispansyon vòl sa a te dwe fini 2 desanm 2024. Poutan, JetBlue deside renouvle li ak posiblite pou ajiste desizyon an selon evolisyon sitiyasyon sekirite a.

Nan yon kominike ofisyèl, JetBlue deklare:

"Sekirite ak byennèt kliyan nou yo ak ekipaj nou an se pi gwo priyorite nou. Konsa, nou pran desizyon pou sispann tout vòl ale ak retou Ayiti jiska omwen 30 avril. Nap kontinye suiv evolisyon sitiyasyon an epi ajiste plan nou yo jan sa nesesè."

Desizyon sa a mete aksan sou difikilte k ap ogmante nan sektè ayeryen Ayiti a, yon peyi kote ensètitid sekirite rete yon gwo defi.