Lendi 12 dawout 2024 la, Konsèy Minis yo te deside apwouve yon nouvo bidjè rektifikatif pou ane fiskal 2023-2024 la. Bidjè sa a gen yon valè 254,82 milya goud, ki reprezante yon rediksyon de 20,5% konpare ak bidjè ki te pwograme anvan an, ki te monte a 320,64 milya goud.
Gouvènman an te oblije fè ajisteman sa yo akoz mank resous yo te espere jwenn nan kòmansman ane a. Anplis sa, akòz sitiyasyon ekonomik ki difisil, yo deside pa fè plis prè oswa pa chèche jwenn plis lajan nan men lòt peyi oswa enstitisyon finansye entènasyonal. Desizyon sa a pran pou evite mete plis presyon sou ekonomi peyi a, tankou ogmante dèt piblik la oswa kreye enflasyon (lè pri machandiz ak sèvis yo monte twò rapid).
Nouvo bidjè a gen priyorite pou ranfòse sekirite nan peyi a, ede moun ki pi vilnerab atravè pwogram sosyal, kreye djòb, epi relanse aktivite ekonomik. Gouvènman an vle tou asire bon gouvènans, konbat koripsyon, epi prepare pou pwosesis elektoral k ap vini an.
Nan bidjè sa a, sektè edikasyon an resevwa 34,32 milya goud, sektè jistis ak sekirite piblik la resevwa 27,18 milya goud, ak sektè travay piblik ak transpò a resevwa 25,52 milya goud. Epitou, 23,60 milya goud pral itilize pou peye dèt piblik peyi a.
Opmerkingen