Dapre nòt ofisyèl Gouvènman an soti, plis pase 23,000 moun ki deplase kite kay yo, nan kapital la, ap resevwa yon pla manje cho nan kad yon operasyon solidarite ki vize soulaje yo nan mitan kriz sekirite ki kontinye mete lavi yo an danje. Aktivite sa a, ki pwograme pou dire 14 jou, kouvri kat sit estratejik kote bezwen yo pi ijan.
Operasyon an ki anba direksyon Fon Asistans Ekonomik ak Sosyal (FAES), an kolaborasyon ak Direksyon Pwoteksyon Sivil (DPC) ak Pwogram Alimantè Mondyal (PAM), ki pran angajman pou asire founiti manje yo rive nan bon kondisyon. Premye Minis Alix Didier Fils-Aimé te rasanble volonte entènasyonal yo, tankou BID ak PAM, pou rann posib aksyon sa a ki ofri kèk moman soulajman.
Malgre efò sa yo, plizyè moun deplase fè konnen yo t a pito sekirite retabli nan katye yo, oswa jwenn yon pi bon kote pou yo rete, olye yo rete depann sou distribisyon manje nan kan provizwa yo. "Nou bezwen tounen lakay nou avèk lapè, pa sèlman resevwa manje nan ensekirite," te di yon manman de (2) pitit ki t ap pran manje nan youn nan sit yo.
Pandan chak jou pi plis bandi ak zam ap kouri dèyè popilasyon an, pou mete l dòmi nan lari, li klè otorite ayisyen yo poko janm ka mete sou pye yon pwogram sipò solid, ki ka reponn non sèlman bezwen primè popilasyon an, men tou, tout lòt difikilte y ap konnen nan domi nan sit yo, nan move kondisyon, kote timoun yo p ap byen swen, espas la pa reponn ak bezwen popilasyon an, epi leta pa garanti yo y ap ka kite sitiyasyon sa nan pa twò lontan. Tandiske inisyativ plat manje cho yo reprezante yon ti gout rekonfò, pandan reyalite a ap toujou rete menm.
Si leta Ayisyen pa pran responsablite l konkrètman pou wete popilasyon sila nan mizè ak enstabilite y ap konnen chak jou pi plis la, sitiyasyon sila riske eklate nan yon nivo k ap depase kapasite Jesyon menm leta sa a.
Comentários