Anba direksyon Premye Minis Alix Didier Fils-Aimé, yon Konsèy Minis espesyal te rive fèt, ayè jedi 21 novanm 2024 la.
Reyinyon sa a, ki te gen ladan Prezidan Konsèy Prezidansyèl Tranzisyon an (CPT), Leslie Voltaire, ak konseye li yo, te debouche sou desizyon enpòtan pou adrese defi sekirite a, ak ranfòsman enstitisyon piblik yo nan peyi a.
Nan desizyon yo pran yo, gouvènman an te adopte yon arete ki deklare yon eta dijans sekiritè sou tout teritwa nasyonal la pandan yon mwa. Mezi sa a montre volonte otorite yo pou reprann kontwòl sitiyasyon sekiritè Peyi a, k ap agrave chak jou pi plis, epi ki mete lavi sitwayen yo an danje. Konsèy la te diskite tou sou pwojè estratejik tankou kreyasyon yon Konsèy Nasyonal Sekirite (CNS) ak yon Fon Sipò pou Sekirite Nasyonal (FSSN), ki t a dwe ka ede amelyore jesyon sekirite ak finanse operasyon nesesè yo.
Anplis, gen lòt refòm tankou regilarizasyon dokiman idantite sitwayen ki pa gen Akdenesans, ak kontwòl deplasman ofisyèl manm gouvènman an. Menm si yo poko finalize, Premye Minis la fè konnen li pral bay pwojè sa yo priyorite nan reyinyon k ap vini yo. Atravè aksyon sa yo, Premye Minis Fils-Aimé afime plas li kòm yon aktè kle nan pwosesis tranzisyon an, pandan l ap chèche bati yon avni ki pi estab ak sekirize pou pèp Ayisyen an.
Comments